Quirós va recibir el 4 de mayu a la lesbiana a la que-y denegaron el tratamientu pa ser madre

El conseyeru de Salú y Servicios Sanitarios, Ramón Quirós, unvió una carta a la muyer lesbiana a la que-y denegaron un tratamientu pa ser madre pola so condición sexual. Quirós va recibir a esta persona’l 4 de mayu.
 
El coordinador de Xega –coleutivu que representa a les lesbianes, gais, transexuales y bisexuales d’Asturies–, Mané Fernández, y Irene Saavedra, de la direición de l’asociación, ofrecieron nuna rueda de prensa pa comunicar la situación del casu d’esta muyer mierense na qu’anunciaron que Xega ta plantegándose presentar una querella por prevaricación basada en “motivos de discriminación por razón d’orientación sexual”. Los representantes de l’asociación esixeron a Salú qu’anicie les midíes disciplinaries oportunes contra dos funcionarios: l’inspector de Prestaciones de Mieres, Jaime Sanchez Bello, y el xefe del Serviciu d’Inspección de Prestaciones y Servicios Sanitarios, Amalio Alonso.
 
Xega asegura que tien nel so poder unos documentos que probaríen qu’ésti ye un casu claru de “lesbofobia” y que los problemes surdieron depués de que l’inspeutor de Mieres supiera que la muyer yera lesbiana. Sicasí, los responsables del coleutivu nun proporcionaron a los medios esta documentación qu’inculparía a los dos funcionarios y que llegó a manes de Xega de “forma anónima”. Saavedra recordó qu’hai poco tiempu que se punxo en marcha la Llei d’Igualdá del Principáu y que’l casu de la muyer lesbiana de Mieres choca contra esta norma. Amás, señaló que se reunió con representantes del Institutu Asturianu de la Muyer, a quienes agradeció la so “comprensión”.