Quemen el vehículu particular del trabayador realmitíu por sentencia xudicial na EBHI

|
Quema de coche de sindicalista de la CSI n'EBHI

El coche taba aparcáu enfrente del so domiciliu, onde pintaron na fachada 'Fuera de EBHI'. La CSI, sindicatu al que pertenez, califica l'aición de "represión sindical pura y dura".

Na madrugada del sábadu quemaron de manera intencionada'l vehículu partícular del únicu de los siete eventuales despidíos esti añu qu'European Bulk Handling Installation (EBHI), de la que ye mayor aicionista l'Autoridá Portuaria de Xixón, con un 68 por cientu de participación, viose obligada a realmitir por sentencia xudicial. El trabayador forma parte del Comité d'Empresa pola CSI.

Dende esti sindicatu denuncien esti "casu evidente de represión sindical que nun va algamar los sos oxetivos". El conflictu d'EBHI tuvo una gran repercusión l'añu pasáu y llevó a cuatro emplegaos a entamar una fuelga de fame que s'allargó hasta los 37 díes pa defender el puestu de los siete eventuales, con importantes amueses de solidaridá y una manifestación de sofitu en Xixón.

Dende la seición sindical de la CSI n'EBH recuerden que'l trabayador afeutáu ye "partícipe activu de numberoses denuncies a la empresa por incumplimientos de protocolos de seguridá y continuos descuelgues de conveniu".

Contador Estadistiques