Quemen 200 hectaries en Muniel.los

La reserva natural de Muniel.los y el Parque de Redes sufrieron l'ataque del fueu. Más de 200 hectaries quemaron en Muniel.los, onde'l fueu, que prendió'l sábadu, quedó controláu a altes hores de la madrugada d'ayeri, dexando cerca de 200 hectárees abrasaes. Otros dos focos en Redes, onde quemaron cerca de 4 hectaries tuvieron dende ayeri pela tarde n'alerta a los servicios d'emerxencia d'Asturies.

Los Directores Xenerales de Seguridá Pública y Recursos Naturales y Protección Ambiental camienten que'l fueu foi intencionáu, como demostraría'l fechu de que'l fueu prendiere en dos frentes distintos.

El fueu entamó yá esti sábadu en Muniel.los, onde prendió un focu pa la parte de La Viliel.la y otru nel Monte L.larón, en Cangas del Narcea, qu'a última hora de la tarde d'ayeri paecíen yá controlaos pero qu'atoñaron otra vuelta gracies al aire seco y l'alta temperatura. Seyes helicópteros, un hidroavión y un retén d'ochenta bomberos trabayaron nos llabores d'estinción d'esti fueu, el más importante que se declaró n'Asturies esti añu y que quemó un total aproximáu de cerca de 200 hectaries (de les 5.500 que tien la Reserva) de gran valor mediuambiental, carbayos y fayeos lo más d'ello, anque entovía ta por evaluase la gravedá del dañu, que, nel casu del Monte L.larón dañó les propiedaes que tien la Fundación Osu na Reserva.

José Luis García, de la Fundación Osu, declaró a Asturies.com que'l fueu dañó ente 8-9 hectaries d'una zona osera dafechu y torgó bona parte de los recursos alimentarios de la especie nun tiempu en que los osos anden a l'abeyota y otros alimentos de la seronda, anque nun hai que llamentar daños directos a la fauna, y llamentó la perda d'una viesca que taba ente les meyor conservaes del país, con decenes de carbayos centenarios.

L'orbayu que ta cayendo agora mesmo sobre'l llugar ta ayudando enforma a apagar lo que queda del fueu

D'otra manera, ayeri pela tarde prendíen otros dos fueos nel Parque de Redes, lo que llevó a declarar l'alerta en tolos espacios protexíos d'Asturies, activando'l plan Infopa en nivel 1. El fueu prendió en dos focos, ún pa la parte de La Felguerina, en conceyu de Casu, y l'otru en Sobrescobiu, pero afortunadamente namás quemó que rozu