¿Qué ye la "nube asturiana soberana"?

Cómo los pozos mineros van agospiar centros de computación "eficientes y sostenibles".

El Gobiernu presentó a grandes empreses teunolóxiques nel GSMA Mobile World Congress (MWC) de Barcelona les posibilidaes qu'ufren les vieyes esplotaciones mineres pa la creación de centros de computación ecolóxicos y sostenibles. El conseyeru de Ciencia, Empreses, Formación y Emplegu, Borja Sánchez García, punxo como exemplu'l proyeutu de tresformación del Pozu San Jorge, en Caborana, nun espaciu de procesu y almacenamientu p'agospiar la primer nube de datos propia del país.

“Esta infraestructura va ser el primer pasu hacia una nube asturiana soberana, onde l'Alministración pueda atropar y centralizar los sos datos, amás d'un espaciu pa xenerar nueves empreses y modelos de negociu. La nuesa idea ye que sía'l xerme d'actuaciones futures”, esplicó Sánchez García.

El proyeutu nel Pozu San Jorge

Sánchez caltuvo xuntes con responsables d'Oracle, Orange, Nokia, Cellnex, Microsoft y Huawei p'abordar, ente otres cuestiones, les necesidaes d'almacenamientu que surden por mor del crecimientu de la intelixencia artificial y la economía del datu, asina como pa plantegar la disponibilidá d'Asturies p'acoyer esti tipu d'instalaciones. El titular de Ciencia rescampló qu'Asturies ufre “una oportunidá competitiva” pa estos equipamientos yá que ye posible "instalar centros de procesamientu de datos eficientes dende'l puntu de vista enerxéticu y sostenibles dende'l puntu de vista medioambiental”.

El puntu de partida ye'l proyeutu nel que yá se trabaya pa crear nel vieyu Pozu San Jorge un centru de procesamientu y almacenamientu de datos, nel marcu del conveniu con HUNOSA y la Universidá d'Uviéu. L'oxetivu ye contar con una instalación singular qu'ufra soluciones teunolóxiques, garantice la ciberseguridá y posibilite trabayar con intelixencia artificial, big data o l'Internet de les coses.

La iniciativa plantega actuar sobre la sala de máquina d'estraición, la sala d'embarque y el castillete, toes elles instalaciones en superficie del complexu mineru d'HUNOSA. Na primera propónse llevantar dos plantes p'acoyer hasta 70 armarios de servidores de datos, unidaes d'almacenamientu y alimentación, un espaciu que podría contener más de 1.600 procesadores y superar las 105.000 unidaes de procesamientu independientes (núcleos).

L'Axencia de Ciencia Sekuens cuenta pa esta iniciativa con un presupuestu de 3 millones d'euros venceyáu al Fondu de Transición Xusta (FTX) y nel so desendolcu va participar la sociedá Xestión d'Infraestructuras Públiques de Telecomunicación (XIPTA), que yá cuenta con un bocetu de la propuesta. L'actuación ha respetar en tou momentu la proteición de los inmuebles como patrimoniu industrial.

Na semeya superior, Sánchez García observa una maqueta na so visita al puestu de Nokia. Na imaxe inferior, planta en superficie del Pozu San Jorge.