Que son los Ciquitrinos

Un ciquitrín ye un axetivu del asturianu que quier dicir daqué paecíu a un felpeyu, una persona xostrona, desdexada...etc. Pero los Ciquitrinos son daqué más qu'eso, son un grupu asturianu de los cuálos pudimos disfrutar un conciertu nel chigre Ca Beleño d'Uviéu'l pasáu 24 de xineru.Dende la so pseudopresentación oficial nel Conciertu pola Oficialidá del añu 2000, nun tuvimos munches oportunidaes de velos en direutu, asina n'actuación del día 24 volvieron a demostrar que nun son unos xostrones nin desdexaos, si non una propuesta bien afitada, qu'espurre l'abanicu de la ufierta de música fecha n'Asturies.Un grupu, que como la so música, ta formáu por músicos que vienen de diferentes mundos, percusiones con Antón Barquero, de Lliberdón, la Viérbene, Ú?, y Ruma Barbero de Felpeyu y la Viérbene, que toquen dende'l tambor asturianu, pasando pol bodhran o el bombu, hasta'l caxón flamencu, lo que-yos da una gran fuerza nes pieces más animaes. Pa da-y cuerpu al grupu, tamién ta'l baxista Dani Casielles, de Xéliba y otres formaciones de distintos tipos de música, qu'aporta un baxu intelixente, que cola percusión, forma una perbona base pa la música d'esti grupu.Na parte melódica tan Mero Gutiérrez al saxu, que con Xuan Nel Exposito (Felpeyu, Viérbene) col cordión y Rubén Arias cola gaita, formen una sección que xuega cola capacidá de caún de los instrumentos, faciendo segundes voces, marcando ritmos...etc.
Nel so repertoriu podemos topanos con munchos cantares asturianos, tocaos al estilu Ciquitrinos, pero tamién pieces de música xudía, brasileña, mirandesa,...etc, que forma un mecigayu, que ye animáu pol so celebre gaiteru Rubén.
Inda nun podemos disfrutar d'un discu d'ellos, namás podemos disfrutar d'una canción nel discu "Los nuevos soníos d´un vieyu país" editáu por L'Aguañaz. Esperemos nun tener qu'esperar muncho tiempu pa poder sentir un trabayu completu d'esta formación.