¿Qué negocia i-negozia?

L' Ayuntamientu de Xixón, anque gasta bien n'anunciar les sos iniciatives nel tarrén de les nueves tecnoloxíes, nun vende con elles otro que fumu. Asina lo denuncia'l partíu políticu nacionalista Izquierda Asturiana, que diz que'l certame xixonés pa emprendedores n'internet i-negozia nun ta organizáu como debiere y funciona más como un escaparate de propaganda municipal que como un verdaderu alcuentru ente innovedores y inversores. Ello ye qu'un de los participantes nel pasáu i-negozia, Santiago Fernández, espublizó esti artículu na prestixosa revista on-line Baquia, una de les referencies pa conocer el pulsu de la internet. Nel so escritu, Fernández califica de lamentable la organización del eventu en tantu que nun taben ellí los observadores de les empreses inversores (bancos, sociedaes de capital riesgu etc) teóricamente interesaes no que s'esponía nel i-negozia. Izquierda Asturiana tien pedío al Ayuntamientu de Xixón que dea una rellación de los proyectos asistentes al i-negozia qu'alcontraron ellí financiación, asina como que mande una nota esclaratoria a Baquia, onde'l nome de la ciudá ta agora a l'altura'l betún.