¿Qué foi del "regala n'asturianu"?

Otros años per esti tiempu, nos encontos de propaganda en cais comerciales de les ciudaes d'Asturies yera normal ver anuncios afalando a regalar llibros y música n'asturianu dientro d'una campaña entamada pola Conseyería de Cultura. Aparte de la so efectividá, esta campaña tamién venía acompañada d'otres como la de los nomes propios asturianos o la más criticada de toponimia, que foi la última en facese. Dende la Conseyería de Cultura dicen que la falta d'ésitu de les campañes anteriores esplica en parte el qu'esti añu nun hubiera anuncios que posicionaren los yá per se poco y mal comercializaos productos de la cultura asturiana ente l'afoguín propagandísticu d'esti tiempu, pero tamién avisen de que, n'aprebándose los presupuestos d'esti añu verase qué campañes puen entamase.