Pumares diz que nun habrá vetu en Xixón a los artistes qu'empleguen l'asturianu na so actividá

"Ye un esparate", aseguró'l secretariu xeneral de Foro sobre la intención anunciada por VOX, que lleva la conceyalía de Festexos y xestiona Divertia, de nun programalos esti mandatu.

"Nun atiende a la llegalidá y nun se va facer", añadió Adrián Pumares al ser entrugáu pola prensa a la salida de la la sesión constitutiva de la Xunta Xeneral. El llavianés aseguró que'l so partíu, que gobierna la ciudá más poblada del país xunto col PP y VOX, "sigue nel llugar onde tuvo siempre, nel compromisu cola cultura asturiana y cola llingua asturiana" y rescampló que "los cargos públicos, enantes de facer según qué manifestaciones y según qué declaraciones, han cumplir la llei".

Al igual que fixo'l martes pasáu, defendió' llabor de l'alcaldesa de Xixón nos ochos años que tuvo al frente del Conceyu y amosó'l so convencimientu de qu'estos cuatro años vinientes va siguir na mesma llinia. Sicasí, la primer selmana depués de la so investidura tuvo marcada poles intervenciones en medios de comunicación de la edil de VOX, Sara Concepción Álvarez Rouco, nes que dexó nidia la so intención d'atapar el topónimu Xixón, oficial na forma billingüe 'Gijón/Xixón', y de nun programar a los artistes qu'usen l'asturianu, ensin facer entovía declaración nenguna al respeuto la tamién presidenta de Foro.

Na imaxe, Pumares esta mañana faciendo la función de secretariu de la Mesa d'Edá del Parllamentu al ser el diputáu más mozu, con 34 años.