Pumares asegura que Foro vive “con normalidá l’usu de los trés idiomes d’Asturies a nivel d’organización”

Adrián Pumares acudió’l vienres al uvieín Teatru Campoamor con dellos dirixentes de Foro p’asistir al actu académicu pol XLII Día de les Lletres Asturianes. “Dientru del partíu vívese con normalidá l’usu de los trés idiomes d’Asturies a nivel d’organización, dende les agrupaciones llocales fasta la dirección autonómica, al igual que sucede na sociedá asturiana”, aseguró’l diputáu y secretariu xeneral de la formación.

El llavianés apunto que Foro, “dende la so fundación va 10 años, amosó siempres el so compromisu cola defensa y dignificación del asturianu y la fala eonaviega, emplegando con normalidá y arguyu estes llingües milenaries del Principáu d’Asturies na Xunta Xeneral y nos conceyos”. Asina, amás de falar de normalidá nel so usu organizativamente, rescampló que “dalgunos de los dirixentes que lleven nel partíu dende la so fundación son hestóricos activistes de la defensa y normalización del asturianu y la fala eonaviega”.

Pumares, con motivu del Día de les Lletres, defendió l’emplegu de los dos idiomes na Xunta Xeneral, porque “lo que ye normal nel día a día de les asturianes y los asturianos tien que selo tamién nel Parllamentu asturianu”. Criticó darréu “la utilización política que determinaos colectivos faen de la llingua asturiana pa dividir y crispar a la sociedá asturiana, cuando les llingües tan perriba d’ideoloxíes y estratexes polítiques”.

“Vamos siguir puxando por valtiar complexos y prexuicios respectu al usu del patrimoniu llingüisticu de tolos asturianos”, añadió, pa finar afirmando “nel Dia de les Lletres garantizamos la nuestra voluntá firme de siguir apostando por un usu de la llingua asturiana integrador, respetuosu y tolerante”.

Na semeya, Inaciu Iglesias, Pumares y Xicu Díaz Yepes a la puerta del Campoamor.