Pumares amuesa la so “deceición” pola falta de concreción de Barbón sobre’l modelu d’oficialidá

El diputáu de Foro, Adrián Pumares, nun ocultó depués de la sesión d’esti llunes del alderique d’orientación política correspondiente al añu llexislativu 2021-2022 la so deceición pol discursu del presidente Adrián Barbón. “Tornamos a solicita-y que sía muncho más concretu nes llinies d’actuación de reforma del Estatutu”, aseguró'l llavianés.

A la salida del hemiciclu, el secretariu xeneral de la formación asturiana declaró que “si tuviese qu’utilizar una pallabra pa valorar el discursu d’Adrián Barbón güei ye deceición. Una vegada más desaprovechamos una oportunidá importante pa esgranar llinies de política, eso qu’él llamaba visión d’Asturies, y nun fixo nengún anunciu que podamos calificar de relevante”. Nesi sen, tamién quixo calcar na so “deceición” no que respeuta a les referencies del socialista sobre la reforma del Estatutu d’Autonomía.

“Dende’l primer momentu, naquella reunión col Gobiernu, treslladé a Barbón la necesidá de ver qué proyeutu tenía él pa esa llei que regulase l’usu de la llingua asturiana. Nun lo fixo nesi momentu, sigue ensin facelo y va dando pincelaes a entrugues de los diferentes grupos parllamentarios. Yo creo que nun ye serio, ye un asuntu mui importante que dende Foro Asturias queremos afrontar col máximu rigor y por eso tornamos a solicita-y que sía muncho más concretu nes llinies d’actuación de reforma del Estatutu. Repito, muncho más concretu”, insistió.

Pumares va intervenir mañana na segunda sesión del alderique, onde, falando yá de forma xeneral, apuntó que “vamos trata-y de sacar coses más concretes. Vamos poner enriba de la mesa propuestes y ver cómo reaiciona’l Gobiernu y Barbón a elles”.

El votu 27

A entrugues de periodistes sobre’l fechu de que Daniel Ripa, voceru de Podemos, tea dando por fecho que, col de Pumares, hai 27 votos a favor de la reforma del Estatutu, el llavianés confirmó que “se ta precipitando. Yo nun soi un versu sueltu, represento a un partíu políticu, represento a Foro Asturias, un partíu que tuvo trenta y pico mil votos nes eleiciones de va dos años, y poro naide va falar, nin siquier yo, en nome de la Comisión de Foro Asturias”, órganu que va tener la decisión última de la direición de votu del diputáu.

Na semeya, Pumares entruga al presidente Barbón nel Plenu de la Xunta Xeneral de la selmana pasada.