Pumarín ye la baza del Unión Financiera Asturiana pa igualar la eliminatoria col Quesos Cerrato

El polideportivu de Pumarín va vivir esti vienres otru enllenu pa disfrutar del tercer partíu de la eliminatoria ente l'Unión Financiera Asturiana OCB y el Quesos Cerrato. De ganar los uviedinos, habría cuartu choque’l domingu.

 

Guillermo Arenas nun va poder contar otra selmana más con Fitzgerald y tien les duldes de Spasojevic y Van Wijk, pero sí col apoyu de la so afición, que va tornar a dexar pequeñu’l polideportivu de Pumarín. La imaxe dada pol equipu’l domingu en Palencia da esperances pa pensar na posibilidá de forciar un quintu partíu na población castellana. Natxo Lezcano, pela so parte, tien tocaos a Barbour y Fornas pal alcuentru d’esta nueche (21 hores), que va poder vese en direuto per Teledeporte.

 

Nel casu de trunfu llocal, el cuartu partíu de la segunda eliminatoria pol ascensu a l’ACB celebraríase’l domingu a les 20.15 hores, tamién en Pumarín. Los precios seríen los mesmos que pa güei, esto ye,  5 euros pa socios (3, los junior; 2 infantil) y 15 pa públicu (10, junior; 6, infantil; 2, menores de 6 años). Les entraes pondríanse a la venta mañana a les 10, p’abonaos, y a les 14 hores pa non socios.