Pufu nes academies d'inglés

Deprender inglés, o cualquier otru idioma, pue convertise nuna velea pa quien vaya a una de les grandes cadenes d'academies particulares qu'ofrecen contratar cursos d'ocho meses o más tiempumediante un créditu. D'esta manera, les academies amarren el cobru del cursu enteru y cúbrense énte'l riesgu de l'alumnu pierda interés y acabe dexando l'academia. Quien nun queda cubierta ye la persona que contrata'l cursu, porque anque l'academia nun cumpla, ella va tener que seguir pagándo-y el créditu al bancu.Anque'l proceder d'estes academies nun ta fuera de la llei, munches veces les academies nun espliquen en qué consiste'l procedimientu pa pagar el cursu, viniendo dempués les sorpreses desagradables. Cuando pa encima l'academia tranca y dexa na cai a tola xente que tenía matriculada, la cosa acaba por convertise nun pufu en condiciones, como denuncia l'Asociación Asturiana de Consumidores Afectaos por Academies d'Inglés, que ta acabante d'estrenar esti web en que denuncien los casos que tan dándose n'Asturies al rodiu d'esta tema.