Pueblu encamienta al Conceyu de Ribeseya a celebrar el Plenu ordinariu de febreru

Acusa al gobiernu d'incumplir los alcuerdos rellativos a la periodicidá de sesiones.

"El llabor de la oposición en cualquier institución democrática ye imprescindible pa poder exercer un control y fiscalización vital pal bon funcionamientu de la mesma", apunta Pueblu-Convocatoria por Ribeseya, qu'añade que "el problema surde cuando dende les mesmes instituciones o quiciabes dende les persones que les dirixen non yá nun se facilita esi llabor, que sería lo deseable, sinón que se busca enzancar no posible que s'exerza esi control". D'esta forma denuncia la coalición l'ausencia de convocatoria del Plenu ordinariu de febreru y encamienta al gobiernu de PP y Foro "a que reconsidere la so postura".

Según esplica nun comunicáu, el Plenu de organización celebráu el 19 de xunetu de 2023 afitaba que "el Plenu del Conceyu de Ribeseya celebre sesión ordinaria l’últimu miércoles non festivu de cada mes, sacante los meses de avientu y agostu que nun se celebrará, a les 20 hores", cola opción de que, con motivu de la celebración en Madrid de la Feria Internacional de Turismo (Fitur), nel "mes de xineru va poder adelantrase, retrasase hasta dos selmanes o fundise con el correspondiente al mes de febreru pola Alcaldía". "Llegaos a esti puntu, convócasenos a un Plenu ordinariu el 7 de febreru de 2024" que, según afirma la formación, l'alcalde refirióse a él "como Plenu ordinariu de xineru, y nun esclarió que les sos intenciones pasaben por nun convocar el Plenu de febreru, hasta que Pueblu riquió-y pa ello".

Entiende qu'esta situación "vulnera l'alcuerdu plenariu tomáu el 19 de xunetu de 2023" y limita'l "llabor de la oposición". "A día de güei, entá nun sabemos el conteníu de les materies a tratar nel Plenu estraordinariu del día 14 de marzu, ye de suponer que sía sobre los presupuestos económicos del añu 2024, lo que fai que nos paeza entá más grave", llamenta al tiempu que critica l'horariu del mesmu, 8 hores, en llugar de la habitual de les 20 hores, lo que "imposibilita o siquier enzanca descomanadamente, la presencia de la ciudadanía y el so derechu a la información, anque quiciabes esi sía el motivu".

D'igual forma, "el pretender sustituyir el Plenu ordinariu por unu estraordinariu, que nun inclúi les posibilidaes de 'Encamientos y entrugues' y de 'Mociones'" torga "la nuesa xera de control y fiscalización del Gobiernu municipal al plantegar mociones y entrugues que afecten a la ciudadanía". "Tou fuera tan senciellu como celebrar en tiempu y forma el Plenu de febreru e intentar consensuar la fecha de el 20 de marzu pal de marzu –yá que’l 27 ye’l miércoles de Selmana Santa– y retrasar a ésti l’alderique presupuestariu –si ye que va a esti Plenu estraordinariu del 14 de marzu– pos yá dempués del retrasu de trés meses, habida cuenta de que entá funcionamos con el presupuestu prorrogáu de 2022, nun paez un problema mui grave, que se retrase una selmana más", considera Pueblu.