PSOE y PP mantienen l'empate técnicu n'Asturies

Con namás qu'una diferencia de 3.594 votos con respectu al PP,
el Partíu Socialista algamó la victoria nes elecciones europees
celebraes n'Asturies el día día d'ayeri, IU-Bloque por Asturies
sufrió otru duru golpe cola perda de más de 30.00 votos. Los
partíos asturianos tuvieron unos resultaos decepcionantes nunes
elecciones marcaes pola altísima abstención.



Anque'l PSOE algamó quedar ayeri como'l partíu más
votáu n'Asturies con 196.120 votos (45.78 %), nun pudo poner tierra de
por mediu col PP, que con 192.526 (44,94 %) queda namás qu'a 0,8 puntos
del partíu socialista, reduciendo enforma la diferencia que se dio nel
Estáu Español que foi de dos puntos . La coalición
IU-Bloque por Asturies nun foi quien a parar la caída electoral que
s'albidraba, IU-BPA pasó de 63.912 votos nes europees de 1.999 a 27.262,
del 10,35 % al 6,36 %, nes elecciones d'ayeri, a pesar d'esto los d'Asturies
son los meyore resultaos d'IU en tol Estáu onde perdió casi la
metá de los votos y dos eurodiputaos quedando con otros dos. En cuarta
posición quedó Los Verdes-Grupo Verde (LV-GV) con 1.969 votos,
recoyendo d'esta forma'l votu ecoloxista que quedó huerfanu n'Asturies
al nun presentáse a estes elecciones los asturianos Los Verdes
d'Asturies.



Los partíos d'ámbitu asturianu que se presentaben a esta
convocatoria electoral, Andecha Astur y Partíu Asturianista, algamaron
unos resultaos qu'afiten la tendencia que vienen llevando nes cites
electorales, estancamientu nun casu y perdida de fuerza n'otru. El
Partíu Asturianista (PAS) pasó de 10.693 votos en 1.999 a 1.609
votos nestes elecciones, el PAS d'esta forma confirma la tendencia de la
Coalición Europea cola que diba a les elecciones que baxó del
3,20 % de los votos al 1,20 %, perdiendo los dos eurodiputaos que tenía.
Andecha Astur ye l'únicu partíu d'ámbitu asturianista que
xube en númberu de votos, anque esa subida ye más que discreta.
Andecha namás foi quien a sacar 201 votos más (de 1.467 a 1.668),
a pesar de dir na coalición Europa de los Pueblos, que per otru llau
algamó un eurodiputáu. La revelación de les elecciones
n'Asturies y en tol Estáu foi'l Partíu del Cannanbis que 1.115
votos.



Los resultaos d'estes elecciones vienen mui marcaos pola altísima
abstención. N'asturies esta llegó al 53,67 %, mui penriba del
36.65 % de les anteriores europees, anque hai que señalar que la
convocatoria europea del 1.999 coincidió con unes elecciones
autonómiques y municipales lo que consiguió que daquella tuvieren
una mayor participación les elecciones europees. Con too y con ello
l'abstención n'Asturies tuvo nunos niveles mui paecíos a los del
restu del Estáu español que foi del 54,06 %. Pa ver tolos datos d'estes eleciones pue visitáse l'especial de la web del Ministeriu d'interior.