PSOE y IX rechacen informar na Xunta del contratu con Moreno

Los diputaos del PSOE y del PP refugaron esti vienres la moción del PP na que s'encamentaba al Executivu a unviar a la Xunta una copia del contratu d'axudicación de la programación de La Laboral cola empresa de José Luis Moreno.

La propuesta del Partíu Popular namás cuntó col apoyu parlamentaru del Grupu Mestu, col votu a favor del diputáu del Bloque por Asturies Roberto Colunga. Los asturianistes yá denunciaran el xueves 4 de payares los contactos ente’l Gobiernu y Moreno.
  
Na so moción, el PP tamién encamentaba al Gobiernu a unviar a la Cámara un informe nel que se de cuenta de los motivos que determinaron el nuevu enfoque y el "traumáticu cambiu qu'esti significó na organización y programación de La Laboral de la Cultura". Tamién pide que'l Gobiernu adopte midíes urxentes de sofitu al sector profesional asturianu.

"Pasamos del hipervanguardismo al hiperpopulismo d'un refundiu y rematámoslo güei col tránsitu del elitismu escénicu al gastronómicu, lo cual non se que-y va paecer a les distintes sidreríes y restoranes de Xixón", dixo'l diputáu del PP.

Llamentó amás que la conseyera "derivara" l'alderique a otra parte na pasada interpelación, ensin responder a les numberoses entrugues del PP sobre'l contratu robláu cola productora de Moreno y criticó la falta de tresparencia nesti aspeutu.

Opiniones de los grupos
El diputáu socialista Alfonso Rei xustificó'l refugu del so grupu a la moción yá que al so xuiciu l'axudicación de la programación ye pública y amás indicó que l'Executivu yá unvió al grupu del PP la información que se solicita en dicha moción.
  
Per otra parte Rei valoró la programación y aseguró que la mesma llogró tamién l'aplausu del públicu, como amuesen la cifra d'espectadores.

La diputada d'IX Verdes, Diana Camafeita, retrucó al PP que tolos diputaos de la Xunta tienen capacidá p'aportar a tola información que soliciten al traviés de la moción, polo que nun consideró adecuada la mesma.
  
Pal diputáu del grupu Mestu, Roberto Colunga, la nueva etapa de La Laboral ye la constatación más evidente del fracasu de la xestión cultural del proyectu de la Universidá Llaboral y amás supon una gran falta de respetu a los asturianos.

"En materia cultural el Gobiernu del Principáu paez tar fuera de bolos y vive totalmente ayenu a la realidá asturiana", dixo Colunga, qu'indicó que Laboral Centru d'Arte camina na mesma dirección aldu al fracasu.