PSOE y IX-LV consideren “esaxerada y dramática” la postura de Del Riego sobre les cuentes asturianes

La intervención de Ramón del Riego na Xunta Xeneral foi criticada pol PSOE y IX-LV. Los ex socios de gobiernu calificaron de “esaxerada y dramática” la visión del conseyeru de Facienda de les cuentes y la deuda del país.
 
Según el socialista Álvaro Álvarez, con esta intervención Del Riego trata de xustificar les midíes de retayu que “seguramente tán pensando poner en marcha pero que nun quieren facer públiques”. “Vusté ta esaxerando sobre la situación económica del Gobiernu asturianu, que ye meyor que la d'otres comunidaes. Trata d'esaxeralu, sacala del contestu ‘nacional’ cola fin de xustificar eses midíes”, señaló pa depués asegurar que “si lo que diz fuera cierto, usté taría anunciando midíes muncho más dramátiques que gastar menos en sobres, correos o teléfonu, que ye lo único qu'anuncien”. Asina, al so xuiciu, a pesar de “trabayar a trés turnos, vinieron a la comparecencia mui mal preparaos y namás a llamentase de la herencia recibida”.
 
Na mesma llinia, el diputáu d'IX-LV, Jesús Iglesias, pidió al conseyeru qu'esplicara qué comunidaes tán menos empeñaes que l'asturiana y recordó-y que los informes de la Sindicatura a los qu'alude de manera constante son “de sobra conocíos”. Indicó que nun ta d'acuerdu con demonizar l'endeudamientu” y amosó la so disconformidá cola visión del Gobiernu sobre'l sector públicu. “La vida ye dura y gobernar, más”, díxo-y Iglesias a Del Riego, al qu'aconseyó que “de manera urxente, empiecen a concretar lo que quieren facer”. “Con tanto analís, radiografía, colonoscopia y demás pue morrer el paciente enantes de curalu”, dixo.
 
Otra manera, Iglesias entrugó-y al titular de Facienda sobre la intención del Executivu de presentar proyeutu de presupuestos pal 2012 y, al conocer la respuesta afirmativa, felicitóse d'ello, yá que na so opinión tolos argumentos utilizaos na comparecencia “indicaben una prórroga presupuestaria”.
 
El PP pide concreción
 
La diputada del PP, Susana López Ares, llamentó que la comparecencia del conseyeru nun valiera pa conocer los planes del Gobiernu y, más en concreto, del área de Facienda; poro, nun pue conocese en qué consiste esi “tan anunciáu plan de choque”. “Nesti momentu, nin siquier sabemos si s'empezó col diseñu del plan nin coles polítiques de Gobiernu”, dixo. Por ello, anunció que'l so grupu yá volvió pidir nel rexistru la comparecencia otra vuelta del conseyeru.
 
A xuiciu del PP, el Gobiernu “fixó unos principios pero nun tomó nenguna midida pa cumplilos”. “Asturies nun pue esperar a depués del 20-P pa poner les midíes en marcha. Nun ye cuestión de cuánto se trabaya, sinón lo que se fai", dixo López Ares.