PSOE y IX-BPA emponderen el desarrollu del primer añu de gobiernu conxuntu

Baxo'l títular "valoración d'un alcuerdu tresparente" les fuerces en gobiernu asturianu asoleyaron ayeri un documentu nel que faen pública la so valoración oficial un añu dempués del apretón de manes a trés bandes que roblaba'l gobiernu conxuntu ente PSOE y izquierda Xunida - Bloque por Asturies. El documentu fala de que d'aquella propunxérense 129 midíes concretes de les que yá tan en marcha'l 75%.

Ente los puntos de los que se muestra más arguyosu'l gobiernu de coalición ta la concertación social cola creación del Alcuerdu pal Desarrollu Económicu, la Competitividá y l'Emplegu que se firmó colos sindicatos y patronales y que ye'l pegoyu pas una "política industrial activa" al mesmu tiempu que se va afalar la protección social gracies a l'aprobación de les lleis del Institutu de Prevención de Riesgos Llaborales y del Serviciu Públicu d'Emplegu. Con too y con ello, los problemes estructurales de la deslocalización d'empreses y les apretures de sectores estratéxicos como'l siderúrxicu amenacen el futuru, según el gobiernu.

Nel mediu rural, la valoración céntrase na retafila de denominaciones d'orixe y marques específiques que se consiguieron nesti exerciciu, anque nun se fai mención denguna a la situación del sector llecheru. En cuantes a ordenación del Territoriu, la opinión del Gobiernu ye que'l Plan de Ordenación del Litoral Asturianu (POLA) ye la primera d'una riestra d'actuaciones a favor de la protección del mediu que va seguise esti añu de les Directrices del Área Central y de los parques eólicos..

Capítulu aparte tien na valoración oficial el desarrollu de midíes de protección social, sorrallándose'l desarrollu de la Llei de Servicios Sociales, la promoción de viviendes protexíes y la cooperación esterior, anque la mayor partida presupuestaria nesti sentíu llevóla l'acabante d'asumir competencia sanitaria cola homologación de los hospitales de Xove y les Arriondes y la inminente licitación del Hospital Central nuevu.

Na política educativa empondérase en primer llugar en documentu l'aumentu de la matriculación n'asturianu, afitándose que se matriculó al "triple d'alumnos que nel 2.002" gracies a la "meyora en profesoráu y medios", anque la gran presocupación del añu foi la financiación universitaria .

La valoración de la política cultural desarróllase baxo l'epígrafe "La apuesta por la cultura universal desde nuestras señas de identidad" y dedica casi un foliu de los doce que tien el documentu a falar de la política llingüística, que se valora como de "claru avance na promoción y protección del asturianu" desarrollando los puntos que yá s'adelantaren en programa de gobiernu. La creación de la oficina, la reactivación de la Xunta de Toponimia, l'entamu d'una nueva política editorial y,sobremanera, la xuba de la matriculación n'asturianu son los puntos que más se valoren, anque anque reconociendo como prioridaes meyorar una mayor inclusión del asturianu nel Bachilleratu y na Educación Infantil.

El desarrollu de polítiques pa la mocedá, d'instrumentos de "profundización democrática" en referencia al procurador Xeneral y la llei del Conseyu Consultivu son dellos temes que se traten brevemente nel documentu xunta l'anuncia del desarrollu -más allá de lo que manda'l pautu- de trés grupos de trabayu que preparen el camín a la reforma estatutaria, ello baxo l'ambiciosu titular de "Un apueste decidíu pol desarrollu del autogobiernu"

Ver equí'l documentu íntegru de la valoración d'alcuerdu de gobiernu (formatu PDF)