PSOE y IX-BA despiesllen el Salariu Social

Los grupos parlamentarios de la FSA-PSOE y d'IX-BA na Xunta Xeneral del Principáu han llegaron ayeri a un alcuerdu que despieslla la Llei del Salariu Social Básicu, que queda agora pendiente d'aprebase na Xunta Xeneral.

L'acuerdu tiense nun informe ellaboráu polos servicios xurídicos de la xunta Xeneral qu'encamienta, d'una parte, desaniciar la condición de derechu suxetivu que defendía IX-BA, ello ye, que cualquier ciudadanu que cumpliere colos requisitos se ficiere automáticamente beneficiariu de la renta, como retirar tamién el tope presupuestariu añal qu'aneciaba n'apautar la FSA-PSOE. Asina'l Salariu Social, sustitutu del actual Ingresu Mínimu d'Inserción y que va beneficiar a les families y persones en situación económica más abegosa con un ingresu básicu, nun va tener un tope presupuestariu y el Gobiernu asturianu va tener la obligación d'atender toles solicitúes qu'acrediten tener derechu a recibilu, colo que anque nun ye llegalmente derechu suxetivu sí que lo v tener que ser na práctica, anque con too y con ello, como aclarió la portavoz d'IX-BA Noemí Martín, ello nun quier dicir que'l Salariu Social nun vaya tener una partida acutada nos presupuestos asturianos, que va ser de cerca de 15 millones d'euros pal 2006.

L'alcuerdu sobre'l Salariu Social llegó dempués d'unes selmanes en que la rellación ente los socios de gobiernu foi abondo tensa a cuentu de l'aprebación d'esta prestación, qu'apaecía como ún de los pegoyos del pautu de gobiernu ente FSA-PSOE y IX-BA qu'entovía taben por desarrollar. Dempués d'aparcase'l discutiniu sobre'l Salariu Social nel Debate sobre l'Estáu de l'Autonomía la selmana pasada, los sindicatos mayoritarios UGT y CCOO ficieron posicionamientu públicu pidiendo que se retirare'l tope presupuestariu del proyectu de llei, una solicitú que fizo d'antoxana a l'apaición del informe xurídicu que desatrancaba, definitivamente, l'alcuerdu sobre'l Salariu Social.

El Bloque por Asturies sociu d'Izquierda Xunida, dió ayeri una rueda de prensa poques hores enantes de conocese l'informe que permitía l'alcuerdu na qu'anunció que "daben por fecho" que diba llegase a un alcuerdu ensin falta de facer movilizaciones como llegaron a plantegar los sindicatos nin ensin que franciere l'alcuerdu de gobiernu, anque nel futuru más inmediatu, la negociación del presupuestu xeneral d'Asturies pal 2006 apaez yá como'l siguiente puntu onde va rinchar la rellación ente los socios de gobiernu.