Protestes contra la condena a los sindicalistes Cándido y Morala

L'Audiencia Provincial d'Asturies refugó essta selmana'l recursu presentáu polos sindicalistes Cándido González Canero y Juan Manuel Martínez Morala, ratificando asina la sentencia dictada pol Penal númberu 1 de Xixón pola que se-yos condena a tres años de prisión, el pagu d'una multa caún de 2.160 euros y a indemnizar al Ayuntamientu xixonés con 5.624,83 euros por estrozar una cámara de vixilancia de tráficu nuna de les movilizaciones de Naval Xixón en marzu de 2005. La confirmación de la sentencia puede suponer el so ingresu en prisión nos próximos dies. Dientro d'esti estáu de coses, esti xueves a les 8 la plataforma que pide la so absolución va entregar énte l'Ayuntamientu de Xixón toles monedes d'a céntimu qu'atropó na so campaña "un céntimu contra la represión" coles que pretende pagar la sanción económica a los sindicalistes.

Lo mesmo Morala que Cándido aseguraron que van recurrir el fallu de l'Audiencia al Tribunal Constitucional, pa lo que disponen d'un plazu de 20 dies, pero alvirtieron que nun van pidir indultu. El recursu d'amparu al Triubunal Constitucional puede tardar de cuatro a seis meses en ver si s'almite a trámite. La so resolución podría tardar otros dos o tres años. Sicasí, el xuez de lo Penal númberu 1 de Xixón, Lino Rubio, quien dictó la primer sentencia condentoria, podría ordenar l'ingresu en prisión enantes de conocer si'l Constitucional almite'l recursu.

La primer reacción en contra de la sentencia vieno dende Izquierda Xunida, qu'emitió un comunicáu en que califica de "desproporcionada" la condena, siempre . La formación d'izquierdes camienta que la condena contra los sindicalistes respuende a la modificación del Códigu Penal qu'impulsó nel so día'l Gobiernu de José María Aznar "criminalizando práctiques reivindicatives que se dan davezu nes lluches de los trabayadores". Casu de refugar el Tribunal Constitucional l'apelación de Morala y Cándido, Izquierda Xunida d'Asturies alvirtió qu'entamaría una campaña pa pidir l'indultu por ellos.

Tamién la coalición electoral Unidá fexo llegar "la so más manifiesta refuga a la resolución de l'Audiencia" sorrayando como a unos "trabayadores que defenden los sos puestos de trabayu se-yos aplica tola dureza d'una lexislación antiterrorista más propia d'un estáu d'escepción que d'una democracia". La formación d'izquierda nacionalista denuncia tamién "l'actitú cómpliz del Gobiernu Municipal de Xixón (PSOE-IX) nesti asuntu" que califica como "un pasu más na dinámica represiva de los gobiernos socialistes" al empar que condena la "actitú títere" d'IX que fala de fortalecer la izquierda y la defensa de les clases populares cuando nin siquiera ye a facer, dende la so posición política, que'l Conceyu de Xixón retirare les denuncies contra los sindicalistes".
L'Audiencia Provincial d'Asturies refugó essta selmana'l recursu presentáu polos sindicalistes Cándido González Canero y Juan Manuel Martínez Morala, ratificando asina la sentencia dictada pol Penal númberu 1 de Xixón pola que se-yos condena a tres años de prisión. La confirmación de la sentencia puede suponer el so ingresu en prisión nos próximos dies. Dientro d'esti estáu de coses, esti xueves a les 8 la plataforma que pide la so absolución va entregar énte l'Ayuntamientu de Xixón toles monedes d'a céntimu qu'atropó na so campaña "un céntimu contra la represión" coles que pretende pagar la sanción económica a los sindicalistes.