Protesta pol embalse de Caliao

Ecoloxistes n'Acción tien abierta una campaña de recoyida de firmes contra'l proyectu del Gobiernu asturianu, que-y reclama al Estáu l'enxertamientu del embalse nel Plan Hidrolóxicu

La organización conservacionista Ecoloxistes n'Acción diz que l'embalse de Caliao (Conceyu de Casu) va producir, en casu de facese, un enorme impactu mediuambiental, al somorguiar n'agua un área de gran valor natural que ta declarada como Llugar d'Interés Comunitariu (LIC) y qu'amás ta enxerta na Rede Natura 2000 de la Unión Europea. D'otra manera, los ecoloxistes dulden de la utilidá del embalse, que se plantegó de mano como una instalación pa la "dilución de caudales"utilidá qu'entienden que nun xustifica la construcción de la infraestructura y motivu pol que l'anterior Gobiernu descartó definitivamente la so construcción, esborriándolu dafechu del Plan Hidrolóxicu Nacional col preste de los grupos Socialista y d'Izquierda Unida del Congresu de los Diputaos.

El Principáu defende que l'embalse va ameyorar la calidá del suministru d'agua a los conceyos del centru d'Asturies, pero los ecoloxistes camienten qu'ello nun ye preciso y que pue facese con otres soluciones alternatives. Inda más, el grupu conservacionista denunció va delles selmanes que l'agua de la cuenca del Nalón taba emplegándose cada vegada más pa la xeneración de corriente y menos pal consumu humanu, una utilización que taba llevando a escosar les reserves del embalse de Tañes ensin que d'ello se derivaren responsabilidaes, en cuantes que la llei retiraba dende l'añu 97 la prioridá del usu del agua embalsao pal abastecimientu humanu y dexaba que s'emplegare prioritariamente pa usos industriales.

La idega del Principáu de resucitar el proyectu d'embalse de Caliao, que va solicitar formalmente qu'entre nos Presupuestos Xenerales del Estáu pal 2005 tampoco nun tien el preste de los socios minoritarios de gobiernu. Izquierda Xunida yá alvirtió que l'embalse casín nun entraba nos alcuerdos de gobiernu. Incluso dende'l mesmu PSOE, el sector del SOMA mostró dacuando rocea col proyectu, y pela parte del conceyu de Casu, l'alcalde, el popular Elías Rodríguez diz que un tien xacíu opner un embalse nun espaciu natural