Protesta contra l’embalse de Caliao nel Día Mundial del Mediu Ambiente

El domingu día 5 celébrase'l Día Mundial del Mediu Ambiente, una fecha que delles entidaes sociales, sindicales y politiques enxertes na Plataforma pola Defensa del Parque Natural de Redes van celebrar nel área recreativa de Caliao nun actu festivu y de protesta contra la construcción del embalse que ta previsto facer nesti pueblu del conceyu de Casu.

L'embalse de Caliao lleva apaeciendo na política asturiana de manera más o menos intermitente a lo llargo de les últimes décades. Con nun tar la obra enxerta nel Plan Hidrolóxicu nacional, l'enfotu del executivu autonómicu por sacalu alantre paecía nesta ocasión más claru que n'otres. Sicasí, la presión d'IX-BA, contrarios al embalse, forzó a los sos socios de gobiernu de la FSA-PSOE a comprometese a pidir un estudiu que determine si la obra ye precisa o non, lo que dexa'l proyectu agora mesmo nun intre de paralización.

Dende'l movimientu ecoloxista l'embalse de Caliao ye ún de los grandes degorrios contra los que los conservacionistes asturianos asoleyen les sos argumentaciones más ellaboraes. Asina ye'l casu de la organización Ecoloxistes n'Acción, que diz que'l saltu de Caliao va producir, en casu de facese, un enorme impactu mediuambiental, al somorguiar n'agua un área de gran valor natural que ta declarada como Llugar d'Interés Comunitariu (LIC) y qu'amás ta enxerta na Rede Natura 2000 de la Unión Europea. Los ecoloxistes dulden de la utilidá del embalse, que se plantegó de mano como una instalación pa la "dilución de caudales" utilidá qu'entienden que nun xustifica la construcción de la infraestructura y motivu pol que l'anterior Gobiernu descartó definitivamente la so construcción, esborriándolu dafechu del Plan Hidrolóxicu Nacional col preste de los grupos Socialista y d'Izquierda Unida del Congresu de los Diputaos. El Principáu defende que l'embalse va ameyorar la calidá del suministru d'agua a los conceyos del centru d'Asturies, pero los ecoloxistes camienten qu'ello nun ye preciso y que pue facese con otres soluciones alternatives.

La xornada de protesta que va celebrase esti domingu va incluyir una escursión con guía pel valle de Caliao y los Arrudos a les 11 y una xinta popular y acytuaciones pela tarde, La plataforma va poner autobuses dende Avilés, Xixón, y Uviéu pa los que ye preciso acutar plaza nel teléfonu 985 243581 o nesta dirección de corréu.