Protesta asturiana énte la visita d’Uribe al Estáu Español

El director de l'Axencia Asturiana de Cooperación al Desarrollu Rafael Palacios pidió-y formalmente esta mañana al Gobiernu central que refugue cualquier triba d'ayuda que-y solicite'l presidente de Colombia Álvaro Uribe, al que l'Axencia responsabiliza de violación de los Derechos Humanos, llegando na so política de confrontación cola guerrilla al estremu de la detención arbitraria y la impunidá que llevaron a la dimisión del delegáu de la ONU nel país

La carta que-y mandó Palacios a Zapatero recláma-y que nun ayude al gobiernu de "aparente democracia" d'Uribe, qu'amás ta denunciáu na Corte Penal Internacional, nin a financiar lo que califica de "Plan de Guerra pa Colombia" y ye la segunda que se fai llegar a Moncloa dende Uviéu. Palacios diz que'l Gobiernu español "nun pue ser complice de la guerra sucio nin de la llegalización de los escuadrones de la muerte". L'acusación de l'Axencia tiense en datos qu'aparren: más de cuatro mil sindicalistes asesinaos en dieciocho años, doscientos d'ellos dende la llegada al poder del gobiernu actual, mil novecientes violaciones de tregua, ente elles la masacre de la Comunidá de paz San José de Apartadó, una comunidá que, según Rafael Palacios, nunca se marcó pa un llau nin pa otru na Guerra pero que sufre violaciones de contino. Colombia ye'l tercer país del mundu con más desplazamientos forzaos, dempués del Sudán y de la República Democrática del Congo, datos troos ellos que lleven a camentar al Director de Cooperación que nun ha participase n'actos públicos col presidente colombianu nin da-y ayuda. ONG's asturianes como Soldepaz-Pachakuti emitieren tamién a lo llargo de los últimos díes comunicaos contra la visita d'Uribe.