¿Profesionalizar la traxedia?

La marea negra sigue llegando a la costa asturiana, y esta mañana alcontrábense tres manches enfrente de nosotros, mientres que les playes que más se dañaron güei son les de Cuideiru, sobremanera la Concha d'Arteu.

Neto que en Galicia, los trabayos de retirada del galipote tan dexándose tamién a personal pago, que se contrata al través de la empresa pública Tragsa, que n'Asturies ta reclutando xente al través del tlf 985 27 27 95. Con too y con ello, en Galicia hai muncha rocea col llabor de Tragsa, empresa a la qu'acusen de nun contar con medios técnicos nin de seguridá apropiaos y de tar metiendo en llugares d'especial protección maquinaria pesao que ta estrozando playes y pedreros nuna dinámica de trabayu destayista que nun mira pola atención al mediu ambiente.

Arriendes d'esto, en Galicia hai una bayura de voluntarios que trabayen de baldre y que nun tienen cubiertes necesidaes básiques nin se-yos abona gastu dengún, lo que xenera entovía más rocea al vese los más que van voluntarios en comparanza colos pocos que van pagos a llimpiar. Too ye qu'ente profesionales y voluntarios nun hai xente abondo pa dar abastu colo qu'hai. Esti artículu del portal gallegu Vieiros y esti de La Voz de Galicia aporten bien d'información sobre esta situación.