Problemes pa los servicios llingüísticos nos conceyos

Contra lo que s'esperaba, los convenios de la Conseyería de Cultura colos conceyos que quieran poner servicios locales de normalización llingüística van especificar que les perres qu'aporte'l gobiernu nun van poder xustificase por gastos de personal. El director de política llingüística fala de "trestornu".

El procesu de creación d'oficines y servicios locales de promoción del asturianu nos conceyos pasa per un momentu difícil. La creación de nueves oficines y, sobremanera, la financiación de les que yá esisten, ta acabante de sufrir un contratiempu pola decisión de la Conseyería de Cultura de que los convenios de collaboración colos conceyos y mancomunidaes que quieran poner serviciu de normalización especifiquen que'l presupuestu qu'aporte la Conseyería nun pueda gastase en pagar los sueldos del personal al cargu del serviciu. Ello ruempe cola idea cola que se trabayaba nos conceyos y na Oficina de Política Llingüística de que los gastos de personal corrieren, lo menos en parte, a cargu d'estos convenios.

La decisión de Cultura afecta más directamente a los servicios de normalización de la Mancomunidá de la Sidra, Mancomunidá del Cabu Peñes y Siero. Estes trés entidaes teníen yá en procesu tola documentación pa echar a andar los sos servicios, y, nel casu del Cabu Peñes, yá ta puesta incluso en BOPA la convocatoria d'una plaza pa un traductor que fadría'l cargu de director del serviciu de normalización de Gozón y Carreño. Con too y con ello, el problema más grande deriváu d'esta decisión paez que pue ser pa Siero, únicu de los trés casos en que nun se cuenta con una entidá supramunicipal pa sofitar la iniciativa. Ello ye que la "llei de deficit cero" aprieta muncho a los conceyos a la hora de facer cambeos nes sos cuentes de gastu corriente, y asumir el gastu íntegru de personal pue resultar siempre más fácil pa una mancomunidá que pa un conceyu solu.

El responsable de la Oficina de Política Llingüística, Ramón d'Andrés calificó la decisión de Cultura como un "contratiempu" que va obligar a replantease la situación y "estudiar otres fórmules" na financiación de los servicios. De cualquier manera Ramón d'Andrés sorrayó que, anque la decisión supón qu'anque les perres van tener que gastase n'otros supuestos -siempre rellacionaos cola promoción del asturianu- l'importe de los convenios pa la normalización nun cambia y los conceyos van poder disfrutar d'eses partíes.

La nueva situación nun afecta pel momentu a les plantiyes d'otros servicios de normalización como los esistentes nos conceyos de Xixón o L.lena. Nel primeru, la so responsable ye funcionaria de la Fundación Municipal de cultura y les contrataciones faense al traviés del Serviciu d'Atención al Ciudadanu. Nel casu de L.lena la contratación dependió hasta'l momentu de la Conseyería d'Industria y Emplegu.