Problemes nes cuentes de corréu @asturies.org

A lo llargo de les últimes selmanes esperimentáronse problemes colos redireccionamientos ayenos a la nuestra voluntá. En comprobando los primeros síntomes y avisos de los usuarios punxímonos en contactu cola empresa proveedora del sirviciu y titular de les máquines en que s'asitia.

Dempués de facer un siguimientu del tráficu, viose que se trataba d'ataques de "Spammers" (individuos que se dediquen a facer unvios masivos de correos de propaganda non deseaos) que, operando dende la China, desbordaben la capacidá de les máquines dende la que funcionen les redirecciones @asturies.org, que soportaron por culpa d'estos ataques en dellos momentos solicitúes de más de 300 correos por segundu, lo que xeneraba unos "pescuezos de botella" que torgaben los sirvidores. En viendo que la situación dexaba de ser puntual y pasaba a ser sistemática y más aguda, la empresa cola que tenemos contratáu el sirviciu intentó delles estratexes que nun funcionaron. A resultes d'ello tomose'l determín de reinstalar tolos redireccionamientos (más de 4.200) en máquines distintes de mayor capacidá nes que poder colocar tolos filtros y sistemes de seguridá que torguen estos ataques, que tamién nos dañen a nosotros en cuantes qu'usuarios que somos d'esti sirviciu. Con ello meyoró la situación, pero vimos que siguíen rexistrándose problemes, agravaos pol aumentu de tráficu propiu d'estes feches. Nesti sentíu, y por dar una dimensión de en qué midía ta dañando l'ataque al normal funcionamientu d'Asturies.com, el retrasu que puen apreciar dellos llectores estos díes na carga de les páxines d'Asturies débese precisamente a la ralentización nel funcionamientu de los sirvidores consecuencia del ataque de spam.

Visto qu'entovía nun se dio una solución definitiva pa esta deficiencia nel sirviciu de correu, que nos perxudica gravemente nel desarrollu del nuestru trabayu diariu y tamién a los demás usuarios de les cuentes asturies.org, tamos poniendo tolos nuesos medios pa que esti problema se solucione lo primero posible, anque la igua pasa per manes de la empresa cola que tenemos contratáu'l soporte técnicu d'esti sirviciu. Énte l'actual situación, esta ye la primera prioridá de trabayu que tenemos nesti momentu. Nes prósimes hores vamos entamar a aplicar un paquete nuevu de midíes técniques, que tuvimos estudiando cola empresa sirvidora. Casu de que nos próximos díes nun seamos quien a consiguir una igua definitiva, tendremos de tomar midíes drástiques con esti sirviciu, que si ta fallando ye a causa del usu abusivu y illegal que faen del mesmu terceres persones dende l'estranxeru, situación que tenemos puesta en conocimientu de los nuestros asesores xurídicos por si pudiere ser motivu d'acción llegal contra los sos causantes.