Problemes de perres pal partíu de la Selección Asturiana de Fútbol

Esta mesma tarde, la Federación Asturiana de Fútbol dio una rueda de prensa pa esplicar el puntu de vista federativu sobre'l partíu que en teoría tendría de disputar la selección asturiana absoluta de fútbol contra la de Bolivia nel estadiu Suárez Puerta d'Avilés d'equí a la vuelta d'un mes. Maximino Martínez, presidente de la Federación, esplicó a los medios que la entidá federativa podría desmarcase de la organización del partíu por problemes esclusivamente económicos cola Dirección de Deportes del Principáu que dirixe Daniel Gutiérrez Granda.

Pa la Federación, que tien nesti partíu una de los meyores ocasiones nel añu de recaudar pa repartir a los equipos de fútbol base, nun ye de recibu que Deportes namás-yos asegure 4 millones de pesetes pa estos equipos y que pretenda depués que la Federación participe del esfuerzu tan grande que supón organizar esti alcuentru. Otramiente, anque la Federación nun tien nada en contra de que se faiga'l partíu n'Avilés, nun son quien a entender como va rentabilizase un partíu que cuesta tantísimes perres nun estadiu nel que namás entren 5.000 espectadores (aparte de los que pudieren ganase con grades supletories) y nel que se supón que les entraes tienen de ser a preciu rebaxáu

Ello nun quier dicir que nun vaya haber partíu. Dende la Federación dexaron bien afitao qu'ellos nun piensen trabayar pol partíu nos términos en que lo plantega Deportes, pero si la Dirección de Deportes que lleva Gutiérrez Granda quixere tirar por ello ella sola la Federación nun diba poner traba alministrativa nenguna pa que se ficiere. Entovía ye ceo pa saber que va parar la cosa.