Prisión incondicional pa Fernando G.R.

El xuez de l'Audiencia Nacional Félix Degayón, decretó ayeri l'ingresu en prisión incondicional de Fernando G.R., deteníu'l martes nel Infiestu. El xuez Félix Degayón imputa-y al acusáu un delitu xenéricu de terrorismu y otru de tenencia d'artefactos esplosivos.

La Policía detuvo a Fernando G.R. la madrugada del llunes al martes cuando diba facer españar una bomba casera na sede del PSOE de l'Infiestu. La semeyanza d'esti fechu colos ataques a sedes de partíos políticos y instituciones que vienen faciéndose n'Asturies dende'l 2001 llevó al xuez a pidir investigación sobre la rellación del deteníu con estos ataques.

Pela so parte, el delegáu del Gobiernu Antonio Trevín, que presidió ayeri la Xunta de Seguridá Autonómica, felicitó a les fuerces y cuerpos de seguridá del Estáu pola detención de Fernando G.R, declarando que la operación demuestra que "en nengún momentu se ha baxó la guardia "contra la "radicalidá" y que Policía y Guardia Civil van tar sollertes para "desaniciar" la violencia de les actividadaes polítiques y sindicales. Trevín apuntó que de cualquier manera la detención de Fernando G.R. pue considerase un "fechu aislláu" al ser Asturies una comunidá autónoma na que "nun hai datos oxetivos que permitan falar de grupos radicales".