Principia la campaña eleutoral con más candidatures de la historia

|

Esti vienres entamó la campaña eleutoral de les nacionales anticipaes del 25-M, nes que van partipar 21 candidatures, un récor en democracia. Bloque-UNA-LV-GV y Andecha Astur presentaron el diseñu del cartelu col que van pidir el votu.
 
Un total de 989.732 asturianos, de los que 899.939 son residentes n’Asturies y 89.793, emigrantes, tienen derechu a votu nestes eleiciones nes que l’asturianismu va tar representáu pol Bloque por Asturies-Unidá Nacionalista Asturiana-Los Verdes-Grupo Verde (Bloque-UNA-LV-GV) y Andecha Astur. Xunto a estes dos formaciones, otres 19 van aspirar a entrar na Xunta Xeneral, onde nesta llexislatura tuvieron representación cuatro partíos políticos: FAC, PSOE, PP y IX-LV. Según la encuestra preeleutoral espublizada ayeri pol Centru d’Investigaciones Sociolóxiques (CIS), a estos partíos xuniríase tres el 25 de marzu Unión Progreso y Democracia (UPyD). Hai que destacar, que nesta ocasión Izquierda Xunida preséntase en solitariu tres la decisión de Los Verdes d’Asturies de sumase al proyeutu d’Equo, que debuta nunes eleiciones a la presidencia d’Asturies.
 
Rafael Palacios va repetir como candidatu de la coalición Bloque-UNA, la fuercia asturianista con más apoyos, que nesta ocasión suma al proyeutu a la formación ecoloxista Los Verdes-Grupo Verde. Na cita coles urnes del 22 de mayu, los nacionalistes sumaron 6.160 votos (1,03 por cientu del total), mentes que los ecoloxistes algamaron 3.626 (0,60 por cientu). Pela so parte, Andecha Astur, que nes nacionales anteriores incorporóse a la plataforma d’eleutores Conceyu Abiertu (1.421 votos, un 0,24 por cientu del total), presenta como cabeza de llista a Arturu Xosé Bermeyu.
 
El restu de partíos y candidatos que yá tán trabayando na campaña eleutoral son el PSOE (Javier Fernández), Escaños en Blanco (Luis Prado García), Izquierda Xunida d’Asturies (Jesús Iglesias), Unificación Comunista de España (Roberto González Salvador), Unión Progreso y Democracia (José Ignacio Prendes), Partido Popular (Mercedes Fernández), Foro de Ciudadanos (Francisco Álvarez-Cascos), Unión Renovadora Asturiana (Francisco Javier López Alonso), Solidaridad y Gestión Internacionalista (Francisco Rafael Gómez del Castillo Segurado), PACMA (Carmen Anes), Equo-Los Verdes de Asturias (María del Pilar Calvo), Partido Democrático y Constitucional (Arturo García Rodríguez), Ideas-Hartos.org (Miguel Ángel Villalba), PCPE (Raúl Martínez Turrero) y Movimiento Social Republicano (Jesús Antonio Ruiz Gómez). Amás, pal occidente tamién se presenta la formación galleguista Partido da Terra Eo-Navia, col independiente Anxel Suárez Álvarez como candidatu, y el Partido Humanista nes dos ales. Mentes, nel oriente debuta l’Agrupación de Electores Auseva Red (Nerea Granda) y el Partido Familia y Vida (Pedro Ferrer Piñol). Hai que destacar qu’Ideas-Hartos.org namái se presenta pola circunscripción central y occidental, y Solidaridad y Autogestión Internacionalista, pola central.
 
Cartelos eleutorales
 
Bloque por Asturies-UNA-LV-GV presentó, coincidiendo col aniciu de la campaña eleutoral, los sos cartelos eleutorales, más lluminosos que los de la convocatoria anterior. Nella pue vese a los númberu ún y dos de la llista de la coalición asturianista y verde, Rafael Palacios y Yolanda Huergo, con un paisaxe asturianu de fondu. El lema utilizáu nesta ocasión ye ‘Piensa otra Asturies’, que va acompañáu, na parte inferior, de la frase ‘El 25 de marzu nun te conformes colos de siempre’.
 
Pela so parte, Andecha Astur sigue la mesma llinia de cartelos eleutorales anteriores, ensin la presencia del candidatu, destacando’l lema de la campaña: ‘L’Asturies que nun se rinde’.

Conteníu especial: 

Comentarios

Nes ultimes gano Cascos, porque la xente creyeren en elli, como persona de pesu, i coyo los votos de xente, que non comulguen con so collor.Pero pudo facer daque por Asturies,  i non lo fixo....Ye sabiu que'l  mesmu demoniu  bonu ye, si fai lo que un quier,solu con la so personalida!
Los asturianistes ????De pena,Palacios ye meyor pa los palestinos,que p'Asturies.Non con facer un partiu ya la xente los va votar, sin una sola personalida de pesu i confianza de facer dalgo,mas que un xuegu nel chigre.
Tou quien Asturies ame , que  non vote pol PP o el PSO ,que  solu fixieron rision de tou lo asturianu, el mal  minor  ye votar por IU con la esperanza, que faigan mas  de lo fechu !!
 

Contador Estadistiques