Primeros datos de la II Encuesta Sociollingüística

El caderalgu de socioloxía de la Universidá del País Vascu, Francisco Llera Ramo, adelantó que mañana va presentar dellos datos de la II Encuesta Sociollingüística d'Asturies, un trabayu que vien a actualizar los datos de la I encuesta de 1991, na qu'una mayoría pergrande reconoció l'asturianu como llingua y mostrábase al favor d'una normalización del mesmu na educación y les instituciones. Les conclusiones a que llegaba l'informe nun debieron presta-y muncho a los sos comitentes, y asina l'informe, encargáu pol Gobiernu asturianu como una ferramienta d'analís pa saber les polítiques sociollingüístiques a aplicar, quedó apigazando nes baldes de los despachos oficiales. L'añu pasáu, la Conseyería de Cultura encargó-y al equipu de Llera Ramo, nel que tamién ta'l sociólogu Pablo San Martín, que reactualizase l'informe faciendo una encuesta nueva, que yá tendría que tar rematada,pero les circunstancies personales de los directores de la encuesta influyeron nel desarrollu de la mesma. La marcha de Pablo San Martín a otra universidá con un programa d'investigación y la difícil situación personal del caderalgu Llera Ramo, tamién director del Euskobarómetro y amenazáu pol grupu terrorista ETA, circunstancia qu'influyó enforma pa que marchare d'Euskadi aceptando una beca nos EEXX, dexó la Encuesta nueva a medio acabar, y nun se sabía seguro que pasaría con ella. La otra selmana, el Conseyeru de Cultura, Javier Fernández Vallina, dixo que a cuenta de les circunstancies personales de Llera Ramo, la encuesta nun diba terminase, pero Llera Ramo ta acabante d'anunciar que presentará mañana mesmo los primeros datos de la encuesta n'actu públicu xunta la presidenta de l'Academia de la Llingua Ana Cano. La contradicción ente la pallabra que dio'l Conseyeru la otra selmana y l'avisu de que la encuesta ta faciéndose espeya la falta de comunicación de les instituciones col equipu académicu que ta desarrollando esta encuesta. Na edición de mañana d'Asturies.com apurriremos más información.

Contador Estadistiques