Primeros alcuentros alternativos y populares de Bimenes esti sábadu

|

Esti sábadu tendran llugar los primeros alcuentros alternativos y populares de Bimenes. Van cuntar coles actuaciones de grupos como La Tarrancha o Arma X y va homenaxease a la llucha minera.

La plataforma 'Asturies en pie', qu'apigura a diversos movimientos sociales asturianos, entama esti sábadu día 31 los Primeros Alcuentros Alternativos y Populares de Bimenes. Van empezar a les 12 de la mañana con un homenaxe a la llucha minera nel Monumentu Mineru de Santuyano. Darréu, a les 13 hores, va homenaxease a Los Fugaos en Fayacaba (Peñamayor). La mañana va terminar con una xinta nel monte a les 15 hores, nel Xerru Gües (Peñamayor), onde va haber comida vexetariana amás de chorizu de Bimenes. La organización encamienta compartir tresporte al nun haber munchu aparcaeru.

El platu fuerte de la xornada va ser el conciertu nel Polideportivu les Escueles de Martimporra. Va tar presente'l mezigayu ska de La Tarrancha, amás del rap combativu d'Arma X. El cartelu va completase coles actuaciones de los cántabros Los Bonitos del Norte y el DJ Dani Antistailo. Les entraes cuesten 5 euros si se merquen por anticipao, o 7 euros nel mesmu día, y va haber prau p’acampar.

 

Contador Estadistiques