Primeres comparecencies sobre’l mandatu-marcu: “La RTPA tien que ser un apoyu básicu pa la normalización del asturianu”

La sala Constitución de la Xunta Xeneral acueye les comparecencies informatives sobre la ellaboración del mandatu-marcu de RTPA. Cinco de los seis primeros espertos fixeron referencia a la cuestión llingüística nes sos intervenciones, que resumimos nestes llinies.

L’investigadora especializada na xestión y el valor del serviciu audiovisual públicu a nivel estatal y européu, Azahara Cañedo, foi la primera n’intervenir. Autora d’estudios fechos sobre RTPA, afirma que “hai qu’aprobar el mandatu-marcu”, que “nun ye un asuntu menor que deban tratar a la llixera, sinón que ye una cuestión de garantía de valor públicu y de sostenibilidá económica y social”.

“Esti mandatu-marcu y los sos derivaos contratos-programa han ser pensaos y redautaos como un pautu cola ciudadanía asturiana. Entrambos, en base a la teoría del valor públicu, han de fixar una serie de compromisos pa complementar una llexislación que ye imprecisa y que nun ta adaptada al contestu mediáticu actual”, siguió la esperta, qu’enumeró darréu un total de 8 compromisos. Nel sestu, “atender na ufierta programática a la diversidá ensin perder de vista l’apuesta pola proximidá”, citó la necesidá de tener en cuenta, “cómo non, la diversidá llingüística, con esi mandatu de preservar y promover l’asturianu”, cuestión que nun quixo ampliar “porque me consta qu’a lo llargo de la xornada pasarán persones especializaes en materia llingüística muncho más preparaes que yo pa falar d’esta cuestión”.

Marcos Martínez Merino, del coleutivu Lluces (Asociación de Creadores Audiovisuales Independientes d'Asturies), rescampló “la nuesa apuesta decidida pola Radiotelevisión Pública d’Asturies. El so papel nun ye importante sólo pola so capacidá d’aproximar y poner en valor la nuesa sociedá, la nuesa cultura o la nuesa llingua, o pola so capacidá de xenerar actividá económica y emplegu, sinón que tamién resulta trescendental na implementación d’inercies y étiques sectoriales, les aspiraciones y inspiraciones de les empreses y profesionales, la captación de nuevos talentos, la retención de los nuesos mozos cualificaos, la creación de tendendencia y innovación, o la busca de mercaos nuevos”.

Nuna intervención que tocó munchos temes, señaló que “esmoleznos tamién el procesu de normalización del asturianu na nuesa radiotelevisión pública, qu’apoyamos con decisión”. “Compartimos la necesidá de reforzar la presencia del asturianu y la meyora formal y llingüística del so tratamientu na programación de RTPA, ¿pero disponen d’indicadores fiables sobre l’usu del asturianu na programación de RTPA na actualidá? ¿Y sobre’l so tratamientu? ¿Va cumplise l’oxetivu de normalización del asturianu cola mesma dilixencia que’l restu de la llei? ¿Cómo piensan planificar, ponderar y supervisar los oxetivos que s’afiten?”, entrugóse Merino.

“Ye importante señalar nesti aspeutu qu’una de les meyores formes de garantizar la promoción y difusión del asturianu ye produciendo conteníos profesionales de calidá. La dignificación del asturianu y del sector audiovisual tien que ser un binomiu inseparable”, afirmó.

“Radiotelevisión de país” y modelu llingüísticu

Énte l’ausencia de Rafael González Muñiz, el siguiente en tomar la pallabra foi Esteban Abalde, trabayador de RTPA, que se centró sobre manera en midíes pa garantizar la independencia del mediu y en cuestiones llaborales. El cineasta Ramón Lluís Bande, pela so parte, espunxo n’asturianu diez puntos “esenciales”, siendo’l primeru “una radiotelevisión de país”.

“RTPA tien qu’autopercibise y proyeutase ente los espectadores como una televisión de país, esto ye, esmolecida pol territoriu del que naz. Una realidá que ta rellacionada d’igual manera cola identidá de la so propuesta de comunicación como cola so entidá”, apuntó, rescamplando nel puntu 2 una apuesta polos programes “que tengan claramente una dimensión de serviciu públicu”. La “pata fundamental” de la mesma sería los informativos, qu’habríen tener “una visión propia, non subordinada a nenguna realidá ayena a l’asturiana, oxetiva, ensin interferencies polítiques y onde los profesionales tengan control sobre’l propiu trabayu”.

Bande apuntó tamién que “la otra gran prioridá d’una programación de serviciu públicu son los programes a esparder la cultura y la identidá propies, asina como la programación infantil y los programes de debate políticu, anguaño ensin presencia na parrilla”. “La canal tien qu’apostar por conteníos qu’ayuden a incrementar el nivel cultural y el pensamientu críticu de los espectadores”, aseguró.

Nel tercer puntu centróse nel modelu llingüísticu. “La RTPA, como ente públicu de comunicación, tien de ser una de les ferramientes principales pa la normalización, el prestixu y la presencia de la vida pública del asturianu y del gallegu d’Asturies na zona del Navia-Eo. Ye un preséu insustituyible pa garantizar y estender el so usu. La RTPA tien que ser la mayor aliada nel desarrollu de les polítiques de normalización llingüística que se propongan dende los poderes públicos asturianos. La normalización social del asturianu, nun hai que lo escaecer, ye ún de los argumentos que meyor xustifica la esistencia d’unos medios de comunicación públicos”, argumentó.

Torgar la diglosia

Tamién emplegaron l’asturianu nes sos intervenciones los dos comparecientes últimos d’esta primer sesión, Penélope Miranda y Xuan Cándano. La presidenta de l’Asociación de Trabayadores de la Normalización Llingüística recordó que “falar de normalización ye falar de tresversalidá, constancia y planificación. Ensin esos trés pegollos bien afitaos vamos movenos siempre nuna llamorgal na que la improvisación, la mala xestión de recursos y la pantasma de la diglosía puen llevanos a nun ser quien a da-y la vuelta a la situación que viven l’asturianu y el gallego-asturiano”.

“Nesi sentíu los medios de comunicación xueguen un papel importante y crucial pa llevanos pa un llau y pal otru. En concreto, la RTPA habría ser un axente normalizador que-y dea a les llingües d’Asturies especios a los a los que davezu nun lleguen, non porque nun tengan capacidá, sinón porque nun se-yos abre esos espacios. Pela contra, tamién pue acabar siendo otru elementu de perceición diglósica de les llingües d’Asturies que ye lo que les avoca a la desapaición”, siguió Miranda.

La responsable del SNL de Ḷḷena aseguró que “la RTPA tien de valir pa que la xente d’Asturies se conoza y reconoza, ye la llingua asturiana y el gallego-asturiano lo que nos axunta”, y rescampló que “el futuru de los idiomes d’Asturies nun ta na so proteición, ta nel so usu”. Llamentó l’emplegu práuticamente únicu del asturianu na programación cultural, criticó que l’usu de la toponimia oficial se diera namái nos rótulos, non na fala, y reivindicó la necesidá de presencia del idioma tamién na programación infantil, poniendo como exemplu a Galicia; en retresmisiones deportives; entretenimientu –“que tenga como oxetivu una audiencia variada” y con producción propia–; y informativos –“si podemos facer 5 minutos, podemos facer l’informativu enteru; hai profesionales y hai medios”–.

“Una radiotelevisión billingüe”

Cándano, pela so parte, criticó que la RTPA naciera “col mesmu llastre que’l restu de radiotelevisiones autonómiques al tar controlaes pol Gobiernu de turnu” al desoyir la propuesta de l’Asociación de la Prensa y del propiu periodista de que’l conseyu d’alministración tuviera un 49 por cientu de representación de los partíos políticos y un 51 por cientu de la sociedá civil asturiana. Una independencia “que se-y quitó cola primer emisión”.

“Echo en falta na RTPA más audacia, más atrevimientu, más producción propia, más compromisu col país y la so cultura”, espresó Cándano “falando como espectador”. Demandó programes de debates y “una RTPA onde l’usu de la llingua asturiana seya mayor y en tou tipu d’emisiones, entamando pola programación infantil y los informativos”.

“La RTPA tien que ser una radiotelevisión billingüe, como la propia sociedá asturiana, y un apoyu básicu pa la normalización social y la recuperación de la llingua asturiana, en retrocesu y claru peligru de desaniciu. Si nun ye asina nun tien sentíu la so propia esistencia. Toles radiotelevisiones autonómiques en comunidaes con llingua propia faen del so usu y la so recuperación una xera esencial, y neso la nuestra paez que ye una murnia esceición”, afirmó.

Un serviciu de normalización llingüística

Nel turnu d’entrugues, namái Cova Tomé, diputada eleuta por Podemos, llanzó una entruga no que cinca a la cuestión llingüística. Foi a Miranda, sobre si esiste un modelu d’utilización del asturianu na RTPA y la so opinión sobre la necesidá d’una Direición de Conteníos d’Asturianu y Gallego-asturiano.

Sobre lo primero, apuntó que “desconocemos si esiste un modelu, lo que sí que conocemos ye qu’esiste improvisación”, polo que demandó una planificación “básica pa la normalización” y tresversalidá. “Ye necesario qu’haya un organismu, un serviciu de normalización llingüística, que xestione los conteníos llingüísticos”, apuntó, “dalgo necesario pa que la llingua asturiana y el gallego-asturiano tenga una presencia normalizada y digna, y pa que la RTPA sirva como ferramienta”.

Na imaxe, na primer filera, Cándano, Miranda, Bande, Abalde y Cañedo.