Primer discu del grupu de rock avilesín Brecha

El grupu de rock "Brecha" presentó na mañana d'ayeri'l so primer discu que lleva'l nome de la banda.

"Brecha" ye un grupu asturianu que sigue esa pequeña corriente de creación de grupos de rock que vien dándose n'Asturies de va poco p'acá. Esta corriente apadrinada por "Avalanch" tien otros continuadores como son "Vendaval", "Rivendel Lords" o de los que güei falamos "Brecha". Anque la banda debuta con esti cd, los más de los sos componentes tienen abonda esperiencia nel mundu de la música. Rescamplen ente los nomes de los músicos los de Juan Lozano (ex-Avalanch) na voz y Toni Bustamante (ex-Marvel) nes guitarres, esperimentaos rockeros asturianos a los qu'acompañen Clima col baxu, Orlando Bustamante nos teclaos y Miguel Herrero na batería.

El discu grabóse nos estudios Acme d'Avilés producíu polos miembros de la banda Miguel Herero y Toni Bustamante, anque finalmente mezclóse nos "Rock Estudios" de Bilbo cola collaboración de Carlos Creator. L'apueste del discu nun ye la esperimentación, si non la fidelidá a soníu clásicu de rock americanu, anque eso si, made in Asturies.