Prevención y Control Ambiental escarta xubir a nivel d’alerta’l protocolu de contaminación

|
Prevención y Control Ambiental escarta xubir a nivel d’alerta’l protocolu de contaminación

El descensu de los niveles de partícules nel aire en Xixón y Uviéu y la previsión meteorolóxica escarta que’l protocolu de contaminación, anguaño en nivel 1, pase al 2, el d’alerta, según confirmó Elena Marañón, direutora xeneral de Prevención y Control Ambiental. La Coordinadora Ecoloxista denuncia permisividá coles industries.

“Les previsiones nun son de lluvia, que vayan a llimpiar en gran midida l’atmósfera, pero nun son tan males como les que tuviemos díes atrás”, apuntó esta mañana tres afirmar que los datos en Xixón y Uviéu son meyores qu’ayeri, non asina n’Avilés, onde se caltienen. Dende’l Gobiernu aleguen a la situación anticiclónica que tamos viviendo, con sol, diferencia de temperatures ente’l día y la nueche, y falta d’agua, a lo que se sumó la presencia de materia particulada procedente del norte d’África dende’l día 16, como causante de la presencia de contaminantes nel aire.

Na opinión de Marañón, les midíes tomaes, como reducir la vecidá nes autovíes a 90 quilómetros per hora, tán teniendo efeutu y ameyorando la situación. Anguaño Uviéu, Xixón y Avilés tán nel nivel 1, n’avisu, del protocolu de contaminación, siendo’l nivel máximu’l 2, d’alerta, pol qu’entraríen midíes entovía más restrictives pa rebaxar la presencia de partícules.

Les industries siguen contaminando

La Coordinadora Ecoloxista d’Asturies denuncia que, a pesar de l’activación del protocolu, “el Gobiernu d’Asturies consiente a les empreses que sigan contaminando lo que-yos dea la gana” al tiempu que “engañen a la xente con midíes pal tráficu cuando ye’l responsable más pequeñu de la esparatada contaminación del aire que sufrimos”. Esti coleutivu entiende que los responsables mayoritarios de la contaminación del aire “son les empreses”.

“Reclamamos qu’en periodu d’alerta como tamos dende hai 1 selmana se proceda a reducir significativamente la producción de forma especial nos procesos más contaminantes”, que nel caso del bencén pasaría por “reducir a la metá’l proceso de producción”. La Coordinadora Ecoloxista demanda tamién la prohibición del “usu de combustibles contaminantes nos procesos d’arranque de les instalaciones: gas-oil, fuel-oil, petcok y similares”.

Semeya tirada esta mañana y difundida pola Coordinadora Ecoloxista d'Asturies.

Contador Estadistiques