Preste institucional pa Lada-Velilla

El presidente asturianu amosó ayeri la so satisfacción énte l'alcuerdu esistente cola comunidá autónoma de Castiella y Lleón y con Rede Eléctrica ESpañola (REE) pa desarrollar el trazáu nuevu de la llinia d'alta tensión Lada-Velilla, que va sacar nun futuru la corriente de les centrales térmiques que tan proyectaes n'Asturies d'equí a la vuelta de pocos años, llevando la tensión eléctrica hasta Palencia. El proyectu nuevu, que lleva'l trazáu de la llinia pel altu Ayer, desanicia l'antiguu que pasaba pel medio del Parque Natural de Redes, pero tamién multiplica por cuatro la potencia de la llinia orixinal. L'alcuerdu que robla la construcción de la llinia nueva firmóse ayeri nel Ministeriu d'Industria y el mesmu ministru Montilla dixo que "esti alcuerdu benefícianos a toos". Dende REE adelanten que la llinia va diseñase partiendo de cero y cumpliendo con toles esixencies en materia de mediu ambiente.

Anque les partes firmantes del alcuerdu dan por fecha la construcción de la llinia, la Coordinadora Ecoloxista alvirtió que va contactar con afectaos de la zona asturiana pa organizar una plataforma contra la llínia. Los conservacionistes asturianos dicen que cuenten con que los vecinos de les cuenques sían tan sensibles al problema como son los vecinos de la montaña lleonesa que ya s'organizaron como Plataforma contra la llinia. Los ecoloxistes argumenten que'l rediseñu de Lada-Velilla amuesa otra vuelta la falta de planificación del gobiernu asturianu y asoleya los intereses de la xestora Red Eléctrica, que califiquen de "un casu sorprendente d'un monopoliu particular que decide'l futuru enerxéticu del país".

Énte los repetíos anuncios dende gobiernu y empreses eléctriques de que la llinia de 400.000 KV ente Lada Velilla ye imprescindible pa garantizar el futuru d'Asturies como productores d'enerxía, los ecoloxistes dicen que se trata d'una "mentira envuelta con precuru" y espliquen que, anque nenguna de les dos llínies tienen traza de dir a funcionar, en toos estos años Asturies nun dexó d'esportar miles de kilowatios, poniendo les cifres del 2004, en qu'Asturies xeneró 20.500 Mw. y namás consumió 9.000. La esistencia de 4 llimies de salida del escedente que vienen usándose dende va años ensin problema faen camentar a los ecoloxistes que Lada-Velilla ye prescindible, lo mesmo que la otra gran autopista eléctrica proyectada con salida en conceyu de Ribera n'Asturies y llegada en Penagos, en Cantabria.

Asturies tien anguaño dos llinies de 400.000 KV con Castiella y Lleón y otres dos de 220.000 KV. con Cantabria, esistiendo amás un proyectu pa da-y más potencia a la llinia esistente ente La Corredoria (Uviéu) y Grandas de Salime pa llevala hasta Mondoñedo en Galicia, xubiéndo-y amás la capacidá hasta los 400.000 KV. Pa más aquello, la entrada en serviciu de Lada-Velilla va producise según los ecoloxistes nun contestu futuru en que los llugares onde agora se consume corriente asturiano van pasar tamién a ser xeneradores de corriente, coloque l'escedente de producción d'Asturies va tener mala salida.