Presidente per una selmana

Tres una selmana nel cargu na que nun dexó d'ocupar toles portaes de la prensa internacional poles sos declaraciones anunciado que'l país nun diba pagar la delda internacional o'l llanzamientu -sobre la marcha- d'una moneda nueva, el presidente de l'Arxentina, Adolfo Rodríguez Saa ta acabante d'anunciar la so dimisión. La intención de Saá apautase con sindicatos y otres fuerces sociales col envís d'aguantar nel cargu hasta l'añu 2003 nun entraben nes cuentes qu'echaben los xerarques del PX, y asina los mesmos peronistes forzaron l'abandonu de Saa, anque la manifestación el día 29 na capital, Bonos Aires, acabó por quitá-y al gobiernu provisional el pocu créditu que-y quedare y llevó a la dimisión de los sos ministros. Ramón Puerta, presidente del senáu, queda agora col cargu tamién de manera provisional. Barrúntase que va haber elecciones el 15 de febreru, anque nun se sabe qué ye lo que pueda cambiar. Nun hai alternativa al peronismu nel poder, y dientro'l Partíu Xusticialista yá suenen tres posibles presidentes: Duhalde, Ruckauf y de La Sota.