Presentóse'l Sporting del centenariu

El Sporting de Xixón de la campaña 2004-2005 presentóse esti vienres pela mañana en estadiu d'El Molinón énte un bon númberu d'aficionaos que nun dexaron d'aplaudir al equipu. La banda de Gaites Villa de Xixón punxo la música nel actu

El Sporting, másimu esponente del fútbol asturianu, enfréntase a una campaña difícil nel añu del so centenariu tres d'una gran temporada 2003-2004 nal que los de Mareo raspiaron l'ascensu a primera división, pero los problemes financieros, qu'obligaron a desfacese de dellos xugadores de los que más brillaron l'añu pasáu, dexen al equipu tocáu a la espera de posibles incorporaciones. Asina lo dio a entender el capitán Samuel, quien emponderó en nome de tolos futbolistes el sofitu de la "meyor afición del mundu" y reconoció con modestia que l'equipu nun puede prometer grandes trunfos esti añu, anque espresó'l deséu de tola plantiya de trabayar por sacar alantre una bona campaña. Darréu d'elli faló'l presidente de la entidá deportiva Vega-Arango, quien reconoció implícitamente lo difícil d'una campaña na que "los oxetivos va volver a marcalos la propia competición". L'alcaldesa de Xixón, Paz Fernández Felgueroso, dixo tamién unes palabres d'apoyu al equipu pa rematar la parte institucional del actu..

En cuantes al bloque que se presentó güei, como yá adelantáremos ayeri, la única cara nueva que pudo vese foi la del arxentinu Calandria. El ex del Leganés va llevar el númberu 11 y xunta elli son tamién altes nel primer equipu los xugadores del filial Ibon Díaz, Miguel Carmena, Jesús María López, y Rafa Belda. Lo que nunca nun-y falla al equipu asturianu ye l'afición. El ritmu de renovación d'abonos y afiliación de xente nuevo sigue mui altu y munchos sportinguistes pasaron peles oficines del estadiu a sacar l'abonu pa la campaña 2.004-2.005 n'acabando l'actu de presentación, que remató con un entrenamientu dirixíu pol entrenador Marcelino García Toral. El técnicu de Careñes va siguir esti añu al frente del primer equipu, que debuta esta mesma tarde col Llealtá en Villaviciosa
a les siete y media.