Presentóse'l cartel definitivu del Derrame Rock

Ayeri presentóse na sé de la SGAE d'Uviéu el cartel definitivu de la X edición del Festival Derrrame Rock, que va desarrollase del 1 al 3 de xunetu n'Agones (Pravia). Como yá adelantare la organización a lo llargo de les últimes selmanes, los grupos "Orishas" de Cuba, "A.N.I.M.A.L." d'Arxentina, los alemanes "Rage" y la mítica banda de punk "The Toy Dolls" son los cabeces yá anunciaos xunta xente como "Mago de Öz" d'un cartel nel que tamién figuren grupos como los históricos del rock duro "Ñu" y xente más moderno casu de la rapera "Mala Rodríguez" "El Bicho" o "O Funk'ill'o" xunta revelaciones del mercáu discográficu d'anguaño, casu del grupu valencianu de rock sureñu "La pulquería". El festival va pesllase'l domingu 3 de xunetu nuna fiesta de despidida na que van participar ente otros, "Mägo de Oz" y "Despistaos", como remate de la final del Concursu de Maquetes del Institutu Asturianu de la Mocedá y "40 Principales Asturias".

La representación asturiana en Derrame Rock cuenta esti añu cola participación de "Dixebra". La banda de Xune Elipe va tocar el Vienres 1, mientres que'l sábadu 2 va xubir al escenariu "Fé de Ratas" grupu onde destaca la presencia de la guitarra de Rafa Kas y que tan acabante de sacar discu. Finalmente, Tante Blanco y los demás Berrones van tocar na fiesta de despidida del certame.

Tocántenes a les actividaes culturales que se desenvuelven paralelamente al Derrame Rock, rescampla ente elles una esposición fotográfica sobre la única visita del Che Guevara a España. Ello foi que nel añu 1959, el Che diba pa El Cairo como representante del gobiernu cubanu. El so avión fizo una escala en Madrid y El Che aprovechó la ocasión recorriendo Madrid pola so cuenta acompañáu pol fotógrafu Cesar Lucas, que fizo les semeyes d'onde sal el material d'esta esposición. Tamién va haber un video fórum con proyecciones documentales sobre los campos d'esterminiu nazi, nel añu del 60º aniversariu de la lliberación d'Auschwitz. Los alderiques van tar presentes col polémicu tema la piratería, nuna mesa redonda onde se quier que tean toles partes implicaes, incluyida la SGAE. El propiu Derrame Rock tamién va tener el so protagonismu nesti apartáu cultural con una esposición sobre los diez años d'historia del festival. Pela so parte, el grupu teatral "Margen" va llevar al escenariu del Derrame'l sábadu 2 la obra "War".


Más información na web del Derrame Rock