Presentóse la delegación asturiana en Lorient

Esta mañana presentóse de
forma oficial la delegación que va representar a Asturies nel Festival
de Lorient, qu'entama esti vienres 1 d'agostu. L'actu contó cola
presencia del delegáu p'Asturies del Festival, Lisardo Lombardia, y la
conseyera de cultura, Ana Rosa Migoya.



Na cita cola prensa Lisardo Lombardia fizo un pequeñu resume de
la historia d'esti Festival, que se creó nel 1971 y que foi
convirtiéndose adulces nun de los eventos culturales más
importantes d'Europa. Lombardia tamién destacó que esta ye la
tercer vez qu'Asturies ye la protagonista del Festival como país
invitáu. La primer vez foi nel nel 91, y, siguiendo'l turnu, toconos
otra vuelta nel 98. Anque nun volvía tocanos hasta dientro d'unos
años, el renunciu d'Escocia, que nun podía facese cargu de la
representación por dellos motivos, volvió a da-y a Asturies el
puestu estelar nesta edición. El delegáu del festival
tamién comentó que la representación que va llevar esti
añu Asturies al Festival pue ser guapamente la "embaxada" de
mayor calidá que nunca nun salió. La delegación
fórmenla 250 persones, ente les que tan artistes
plásticos, conferenciantes, representación institucional y un
llargu etc qu'incluye, por supuesto, la parte músical, noyu de la representación astur. Felpeyu y Tejedor son los dos nomes más conocíos d'un equipu que tamién lleva el "Concierto de Asturias" con Hevia, Nuberu, Mariluz Cristobal Caunedo, Victor Manuel y otros artistes. Grupos etnográficos, bandes de gaites y los participantes asturianos nel concursu Macallan de gaita completen esta reptresentación musical.



Pela so parte la conseyera de cultura Ana Rosa Migoya destacó'l
sofitu del gobiernu del Principáu a esti eventu, pal que punxo una
aoprtación económica de 47.000 € (7.820.142 pts). La
conseyera quixo tamién destacar la collaboración de la
Dirección Xeneral de Turismu, la dirección Xeneral de Cultura y
l'Institutu Asturianu de la Mocedá. Ana Rosa Migoya tamién
comentó la gran calidá de tola representación,
rescamplando al so paecer como actuación de más aquello "El
Concierto de Asturias" con Victor Manuel.

Dende Asturies.com anunciamos qu'esti añu vamos tener un especial nel que vamos dir actualizando, al traviés del nuestru corresponsal especial en Lorient, tola actualidá dl festival