Presentóse "El faru d'Iyán"

La cadena particular Teleasturias presentó ayeri al públicu y los medios de comunicación la versión n'asturianu de la serie americana de debuxos animaos "Salty's Lighthouse" que sedrá pal públicu astur "El faru d'Iyán". Esta serie, que la cadena va emitir tolos vienres a les 20:45h, repitiéndola los sábados a les 15:30h, ye la primera producción televisiva que se traduz al asturianu, una xera difícil de la que s'encargó'l periodista y escritor Chema Vega cola ayuda de l'Academia de la Llingua Asturiana.

La presentación, auténtica preba de fueu pa la serie, enllenó una de les sales de los cines Yelmo Cineplex d'Uviéu de xente mayor y de rapacinos que nagüaben por ver el resultáu de tantísimu trabayu. Depués de les obligatories presentaciones y discursos, con una directora xeneral de cultura que s'esforzó por falar n'asturianu énte la sala, proyectáronse cuatro episodios de diez minutos de la serie, que dexaron contentu a cásique tolos asistentes, que comentaben al salir lo creible y bien trabayada que resultaba la torna de la serie, que tuvo de facese en Madrid (anque con voces asturianes) por falta de medios técnicos.

Empobinada a un públicu de neños y neñes de mui pocu tiempu, "El faru d'Iyán" tien que convertise na primer serie qu'ayude a ver como normal ver tv n'asturianu, y nesti sentíu comentose depués de la presentación que la mesma Teleasturias, que s'enfota bastante nel proyectu, yá tien pensao enanchar campu faciendo más series, falándose incluso de facer na cadena una estaya de doblaxe con un calter estable. La futura televisión autonómica tendría que ser un consumidor d'esta clase de series y d'otros productos n'asturianu, pero evidentemente, el Faru d'Iyán nun sedría posible ensin la subvención de la Conseyería de Cultura, y ello lleva tamién a pensar si estos debuxos qu'entamen a emitise mañana nun sedrán tamién ún de tantos casos aisllaos de normalización que depués queden pa prau. Tenemos que pensar que non.

Si ties curiosidá por ver como ye "El faru d'Iyán" Asturies.com apurre unos cachiquinos curtios de la serie. Calcar col botón derechu y marcar "guardar destín como": 1 y 2