Preséntase’l Primer Congresu sobre l’Horru

El próximu miércoles 3 de payares, na sé del Club Prensa Asturiana de la cai Calvo Sotelo, 7, d'Uviéu va celebrase a les 8 de la tarde'l debate "L'horru, graneru d'idegues" un actu col que quier presentase públicamente'l I Congresu sobre l'Horru, cita que va desarrollase nel Auditoriu Príncipe Felipe d'Uviéu el 29 y el 30 de payares y na que va tratase sobre esti elementu identificativu del paisaxe asturianu dende múltiples perspectives, falando tanto del valor que tien como patrimoniu y cultura como de la técnica aplicada a la so construcción y les sos perspectives de futuru.

Asina, el congresu va facese alredor de cuatro "pegoyos" o exes temáticos. El primeru d'ellos centráu nel "horru como arquitectura" va contar cola participación d'arquitectos como
l'asturianu José Angel Rivas Andina o'l gallegu Pedro de Llano. El segundu pegoyu "L'horru na historia" céntrase na evolución a lo llargo del tiempu del horru y va entrar tamién en cuestiones artístiques, participando nesta estaya l'antropólogu Roberto González-Quevedo y el director del muséu del Pueblu d'Asturies Juaco López. La segunda xornada del congresu va repartise ente los otros dos pegoyos, pela mañana "l'horru material" va analizar los problemes de conservación d'estes construcciones y los distintos tratamientos y acciones restauración que puen facese. Pela tarde los espertos participantes nel pegoyu "L'horru y el Turismu" van esponer les posibilidaes de desarrollu del potencial del horru como elementu d'atracción pa los visitantes.


Nel actu de presentación d'esti día miércoles día 3 van intervenir Gerardo Díaz Quirós, Xuan Pedrayes Obaya, Margarita Llorente Herrero y l'organizador del congresu, Xosé Nel Navarro. Más información y formulariu d'inscripción al congresu na web d'Horru.com