Preséntase'l númberu 17 de la revista "Asturies"

El chigre "El Naranco" d'Uviéu (C/San Xosé 8) va acoyer güei xueves a les 21 hores, la presentación del númberu 17 de la revista etnográfica "Asturies, memoria encesa d'un país" qu'espubliza la Fundación Belenos.

Nel actu van intervenir dellos de los autores qu'intervienen nesti númberu de la prestixosa publicación, contándose coles intervenciones d'Alfonso Fanjul y Alex García, autores del artículu "La muria medieval d'Avilés", Francisco Xosé Riestra, autor de "Los barracones de Repipe. Exemplu de vivienda obrera en madera" nel que s'analiza esta desconocida forma d'asentamientu obreru nel Valle del Caudal financiada pola empresa "Hulleras de Turón", y Antón Álvarez Sevilla, autor d'un artículu enxertu tamién na revista sobre "El gochu celta".

Pero, por supuesto, los conteníos d'esti nuevu númberu de Belenos dan pa muncho más. Astur Paredes, coordinador de la revista, faló con Asturies.com pa presentanos los artículos d'esta 17 entrega de la meyor revista etnográfica asturiana.

En primer llugar, Astur Paredes destacó l'interesante artículu d'Oscar García Vuelta sobre'l conxuntu de diademes de Ribadeo, un grupu de trés pieces que s'alcontraron a últimos del sieglu XIX y que, dempués de ser espuestes xuntes nos años 20, tan anguaño en distintos llugares, desconocíendose onde s'alcuentra anguaño una d'elles.

Dempués de salir d'Asturies pel occidente, otru de los artículos d'esti númberu de Belenos llévanos pal oriente, onde la profesora de la Universidá del País Vascu Mari Cruz González Rodríguez fala de "Identidá y llende nes poblaciones del norte hispanu: el casu de los Orgenomescos"Analizando la epigrafía sobre esti pueblu, la profesora reinterpreta los escritos d'Estrabón y llega a nueves conclusiones sobra la figura de los banquetes familiares. D'otra manera, Paredes llamó l'atención sobre l'artículu en que se fala de la muria medieval d'Avilés, onde una escavación circunstancial con motivu d'una obra descubrió una parte desconocida de la muria y dató la época de la construcción en 100 años más d'antigüedá de lo que se pensaba.

Una de les secciones fixes de la revista, la "memoria gráfica" dedícase nesti númberu al archivu gráficu de "El Oriente de Asturias" el periódicu más antiguu del país, mientres que dos autores que yá escribieron delles vegaes na revista repiten. Trátase del investigador Alberto Álvarez Peña y del especialista en races autóctones Antón Sevilla. El primeru fai una reinterpretación de la figura del Busgosu na mitoloxía asturiana comparándola cola del restu del continente européu y el segundu asoleya importantes datos nuevos sobre la secuencia xenética del "Gochu Celta" qu'afiten la independencia de la raza. L'artículu enxerta tamién ilustraciones interesantes, con semeyes antigües de gochos celtes en cubiles asturianes. Finalmente, la cronista oficial d'Uviéu, Carmen Ruiz Tilve, fala sobre la interpretación que fai l'escritor Alejandro Casona de la tradición de San Xuan na so novela "La Dama del Alba".

Pa mercar esti y otros númberos anteriores de la revista, pues facelo n'Asturshop, la tienda asturiana na rede con servidor de pagu seguru.