Preséntase en Llaviana'l primer númberu de la coleición 'Terrén'

L'Academia de la Llingua Asturiana da a conocer en sociedá'l títulu que firma Vicente Rodríguez Hevia con un actu qu'inclúi una amuesa de música tradicional.

'La cultura tradicional en Llaviana' ye'l primer númberu de la coleición 'Terrén' de la institución asturiana. Ésta va atropar los trabayos de calter etnolóxicu llendaos a un territoriu xeográficu específicu firmaos pola mesma persona y que se tienen asoleyao a lo llargo los años nes estremaes publicaciones de la institución.

Nesti casu recueye los de Rodríguez Hevia, testos que conformen "un corpus pernecesariu pal entendimientu cultural, social, económicu y territorial del conceyu de Llaviana y reconocen al autor llavianés nel so llabor investigador" apunten dende l'Academia de la Llingua Asturiana (ALLA). En concreto, nesti volume trátense en cuatro capítulos los temes rellacionaos col espaciu cultural tradicional, como los periodos de la güerta y la collecha, l’usu del horru como’l foru del pueblu, la toponimia menor, etc, amás d'un repasu históricu del aprovechamientu de recursos del ríu y el monte y una descripción de les celebraciones del conceyu.

Van acompañar al autor nel actu, previstu a les 19 hores nel salón d'actos del Centru d'Innovación y Desarrollu del Altu Nalón (CIDAN), el presidente de l'ALLA, Xosé Antón González Riaño, y el direutor de la coleición, Roberto González-Quevedo. Una amuesa de música tradicional va abrir y pesllar l'eventu.

Na imaxe, Rodríguez Hevia.