Presentáronse los llibros de testu pa secundaria

Rede 1, d'editorial VTP pa primeru d'ESO y el volume correspondiente de la colección "picos" d'Editorial Trabe pa segundu d'ESO son los dos llibros de testu que contaron con una subvención específica de la Conseyería de Cultura pa editase y que se presentaron esta mañana na sé de la Conseyería d'Educación.

Paz Fonticiella y Esther García son les responsables de "Rede 1" un llibru articuláu en 9 unidaes temátiques, caúna armada alredor d'un núcleu d'interés que-yos pueeda resultar suxerente a los alumnos, como les amistaes, les fiestes, los viaxes o la moda, incluyendo cada unidá seyes separtaos distintos nos que s'introduz una llectura, exercicios prácticos, cuestiones gramaticales, ortográfiques, apuntes sobre lliteratura y, p'acabar, la estaya interdisciplinar "llingua y sociedá".

Pela otra parte "Llambrión" volume de la colección Picos d'Editorial Trabe, ye'l volume que correspuende a segundu d'ESO.

El llibru ye obra d'un equipu coordináu por Severino Antuña y nelli participen Nuria Campos, Alberto Cobreros y otros especialistes. Articuláu en 8 unidaes, cauna entitulada con una frase (colo de vacaciones, doler duelme too) que val de "leit motiv" a tolos exercicios y actividaes que se proponen nella, y qu'incluyen estayes creatives como un "taller lliterariu"y testos divulgativos sobre cultura xeneral de los temes más variaos, dende la historia de la Universidá d'Uviéu hasta'l funcionamientu de los motores de los coches. El volume vien amás con un CD pal mayestru pa poder facer audiciones nel aula.

N'acabando la presentación de los llibros, responsables de la Conseyería d'educación apurrieron les cifres d'escolarización en llingua asturiana, sorrayando'l fechu de qu'entovía nun yeren númberosdefinitivos porque n'ESO seguíen alxudicándose grupos. Con ello, en primaria la cantidá de matriculaos nesti cursu 2004-2005 ye de 15.896 escolinos, un 52,21% del total contra'l 50,07% que recibieron l'asignatura nel 2003-2004, mientres que n'ESO, onde la cifra ye provisional, de momentu son 3.706 estudiantes matriculaos, lo que fai una xuba grande respective al añu pasáu, y ye qu'anguaño l'asignatura d'asturianu llega al 15,88% de los estudiantes d'ESO cuando nel 2003-2004 namás se-yos impartió al 10,96%. Onde'l tantu por cientu y los númberos absolutos son simbólicos ye en bachilleratu, onde son 101 (0,85% del total) los estudiantes que reciben clas d'asturianu.