Presentáronse les Xornaes sobre Normalización Llingüística nos Conceyos

La responsable de la Oficina de la Llingua de Xixón, María Xosé Rodríguez, presentó esta mañana los conteníos de les I les Xornaes sobre Normalización Llingüística nos Conceyos, que van celebrase en Xixón del 15 al 17 de payares y nes que van poder conocese distintes esperiencies de normalización llingüística que se vienen faciendo n'Aragón, Cataluña, Euskadi, Galicia y Valencia y analizar y afondar na situación qu'anguaño ta viviéndose n'Asturies cola puesta en marcha de distintos servicios de normalización llingüística nos Conceyos (ver equí'l programa completu de les xornaes)

Al actu de presentación asistieron tamién la conceyala Carmen Rúa y pol Director de la Oficina de Política Llingüística Ramón d'Andrés, qu'aportaron informaciones d'actualidá sobre les sos árees respectives.

Sicasí, la primer intervención de la conceyala d'educación y llingua asturiana nun foi pa falar de la so cartera, más pa congraciase de l'almisión a trámite de la primer demanda de divorciu n'asturianu de la historia. Darréu d'ello, Carmen Rúa faló de les yá famoses ordenances d'usu del asturianu del conceyu, que lleven tiempu redactaes y presentaes a los grupos políticos con representación nel conceyu y sobre les que Rúa espresó'l so compromisu de llevales a Conseyu de Gobiernu enantes de qu'acabe l'añu.

Otru Conseyu de Gobiernu, el del Principáu, ye del que ta pendiente Ramón d'Andrés. El titular de la Oficina de Política Llingüística d'Asturies declaró que cuenten con llevar tamién enantes de qu'acabe l'añu en cursu, trés espedientes toponímicos (Llanes, El Franco y Carreño) a esti organismu, que ye del que depende facer oficiales los topónimos. D'Andrés nun perdió la ocasión pa recordar que "ensin un Conseyu de gobiernu que lu valide, el llabor de la Xunta de Toponimia nun tien sentíu". D'Andrés esplicó que la so oficina trabaya nesti intre con dos llinies d'actuación preferenciales, una la de la toponimia y la otra la de reforzar la Rede de Normalización nos Conceyos. Sobre esta segunda área, Ramón d'Andrés dixo que xunta los servicios de normalización yá en funcionamientu, tan pendientes d'echar a andar en mui pocu tiempu'l de la Mancomunidá de la Sidra, el de Siero y el del Cabu Peñes, que yá tien responsable na persona d'Eloy Antuña pero que ta pendiente d'una presentación formal. Según adelantó d'Andrés, otros conceyos quieren tamién participar de la iniciativa y crear los sos propios servicios. Ente los conceyos interesaos, d'Andrés citó a Avilés, Mieres, Cangas del Narcea, Samartín del Rei Aurelio y la Mancomunidá de les 5 villes, na que participen Pravia, Muros, Cuideiru, Salas y Sotu'l Barcu.