Presentaciones de llibros n'Uviéu y Llanes

|

Entámense actos pa dar a conocer 'Cróniques d'un machista feminazi' y 'Canción lírica asturiana de conciertu'. La Comuna d'Asturies, mentes, trai a Asturies a Jacinto Lara.

Güei y mañana hai programaes n'Asturies presentaciones de llibros n'Uviéu y Llanes. Esta tarde, a les 19 hores na uvieína Librería Cervantes, va tar presente David Artime pa falar de 'Cróniques d'un machista feminazi' (Hoja de Lata), novela sarcástica que ye una crítica social a los comportamientos machistes que tamién toca'l posturéu dientro'l feminismu.

Mañana Vicente J. Sánchez va falar de 'Canción lírica asturiana de conciertu' (Ediciones Trabe) en Llanes, nel Casinu a les 19.30 hores, acompañáu de la conceyala de Cultura, Marisa Elviro Santo, y el presidente del Ateneo Musical de Mieres, Pablo Álvarez 'Siana'. Eliana Sánchez (declamación), Beatriz Díaz (sopranu) y Mario Bernardo (pianu) van protagonizar darréu una actuación na que van intepretar dalgunos de los 20 cantares recoyíos pol autor, de los que 16 son melodíes de creación nueva (cantar d’autor), 2 son melodíes recuperaes por Eduardo Martínez Torner y les otres 2 populares asturianes.

Obra coleutiva

La Comuna d'Asturies organiza esta tarde, a les 19 hores nel salón de actos del Cibercentru La Lila, n'Uviéu, la presentación de 'Memorias democráticas' (Sylone), cola presencia de Lara, abogado de la Coordinadora Estatal d'Apoyu a la Querella Arxentina (CEAQUA), na que ta integrada esti coleutivu, y coordinador del llibru xunto a Miguel Urbán. Ye una obra coleutiva que trata dende enfoques diferentes la memoria democrática na que tamién escriben Sabino Cuadra, Rosa García, Enrique Gómez, Soledad Luque, Llum Quiñonero, Jaime Pastor, Jesús Rodríguez y Luis Suárez.

"Persíguese coneutar les lluches del pasáu colos conflictos del presente buscando la xusticia, la verdá y la reparación, too ello entrellaciao cola reclamación popular de 'democracia real yá'. La memoria democrática nun pretende reabrir firíes, sinón poder zarralas afondando nos principios más elementales de cualquier estáu democráticu. Por eso ye tan importante, tan urxente y tan actual", espliquen dende La Comuna d'Asturies, que recuerda qu'España sigue siendo "ún de los países con más casos de desapaición forciada del mundu".

 

Contador Estadistiques