Presentación del discu de música tradicional d'Allande

El Conceyu de Tinéu entama pa esti sábadu un conciertu onde se va presentar el discu "Música Tradicional d'Allande", cd nel que varios músicos folk faen un recorríu pela música tradicional d'esti conceyu del suroccidente asturianu. Nel conciertu van tar los músicos responsables del discu, arriendes de los gallegos Batuka Reventola.

El conciertu va celebrase a les 20:00 hores nel Cine Marvi de Tinéu cola entrada llibre. Ellí los músicos Diego Pangua, Dolfu Rodríguez y Xosé Ambás van tocar y falar sobre los sones del discu, editáu pol Conceyu d'Allande y nel que se puede sentir una amuesa de palos bien diferentes, dende les xotes hasta les muñeires o romances. Nel discu pueden sentise unos segundos del informante al que se-y grabó la pieza orixinal, grabaciones frutu del trabayu de campu realizáu por estos músicos, pa darréu sentir una versión d'esi cantar interpretada polos mesmos músicos. Na presentación de Tinéu, la música tradicional d'Allande va contar cola compañía del grupu gallegu "Batukas Reventola", nueve muyeres y una pareya de neños que baillen al son de los ritmos del so país, emplegando instrumentos caseros.