Presentación de la obra de Xulio Viejo sobre la llingua y lliteratura medievales asturianes

"Llingua y cultura lliteraria na Edá Media Asturiano-lleonesa" ye'l títulu del volume que Xulio Viejo tien espublizáu cola editorial Trabe y que se dio a conocer va delles selmanes. La obra fai un estudiu pormenorizáu de tola lliteratura asturiana y llionesa dende l'aniciu del medievu hasta'l sieglu XIII y nel que s'enxerten toles fontes de documentos escritos, dende les que son d'aniciu lliterariu dafechu hasta los testos llegales como testamentos y donaciones o escritures de venta, pasando per cróniques históriques.

L'autor fai na obra un estudiu sobre la evolución de la llingua asturiana a partir del romance llatín y de cómo se va conformando l'autoconcencia llingüística dende finales del Medievu que va cuayar nel sieglu XVII col nacimientu de les lletres asturianes como les conocemos anguaño. Con ello, el pruyimientu del llibru consiste n'afondar en clave asturianista, na idea de que la cultura llatina na Edá Media nun ye daqué estremao dafechu de la cultura popular románica d'Europa, siendo quiparable a la de Lombardía o cualquier otra rexón europea.

L'autor va facer esti vienres día 1 d'abril el primer actu de presentación pública de la obra. Ello va ser a les ocho de la tarde en chigre "El Naranco" que tien abiertu dende va un añu la organización Xunta Pola Defensa de la Llingua Asturiana. L'escritor Xuan Bello va acompañar na presentación al profesor Viejo.