Presentóse l'Anuariu de la Música 2005

El local de la SGAE n'Uviéu foi'l sitiu escoyíu pola casa de discos L'Aguañaz pa presentar el so Anuariu de la Música Asturiana 2005. Esta publicación, qu'esti añu pasa de les cien páxines, fai repás de tolo que-y pasó a la música asturiana anguaño, amás de tener tamién dellos artículos intemporales sobre cuestiones arreyaes a la música asturiana. A lo llargo de la presentación Xune Elipe, responsable de L'Aguañaz y encargáu de presentar l'Anuariu, tamién comentó delles cuestiones sobre l'estáu actual de la música n'Asturies, pa lo bueno y pa lo malo.

Elipe resumió cuálos son los conteníos qu'ufierta l'Anuariu d'esti añu, del que s'editen 2000 exemplares de distribución de baldre, y nel que podemos topar un resume de les noticies más importantes del añu, una entrevista a La Bandina, Skama la Rede y Dixebra, un especial sobre la figura d'Eduardo Martínez Torner, del que se cumplen en 2005 cincuenta años de la so muerte, amás d'artículos de xente como Berto Peña, o'l críticu musical Manolo Abad. Tamién tenemos la tradicional sección de Collecha, que ye un llistáu completu de tola producción asturiana que tenga que ver cola so música, pasando per discos, llibros y documentales. Como novedá nesti quintu Anuariu, esta ye una iniciativa ñació nel 2001, tenemos que vien acompañáu por un discu de 14 cantares patrocináu por Tierra Astur, que ye una esbilla de cantares de grupos qu'anguaño, o d'equí a mui poco, sacaron discu.

Xune Elipe tamién aprovechó pa facer dellos comentarios sobre la so visión de la música n'Asturies. Elipe afirmó qu'Asturies sigue teniendo un nivel de producción musical ablucante en rellación col so tamañu, y que'l 2005 confirmó que nesi sen Asturies sigue tando en buena forma musical. Nel capítulu negativu Xune quixo rescamplar que la industria musical asturiana tien falta de "autonomía comunicativa", colo que la música asturiana queda fuera de los canales de difusión y nun ye quien a llegar al so públicu. Por poner un casu, Xune Elipe comentó que toles emisores musicales que podemos sentir n'Asturies, quitando dalgún casu como'l de Radio Sele o Asturies.com Radio, echen programaciones diseñaes dende Madrid nes que malpenes tien sitiu'l productu musical asturianu. Arreyao a esto último, el responsable de L'Aguañaz quixo llamar l'atención sobre la responsabilidá que tien el futuru Ente de Comunicación del Principáu d'Asturies pa iguar esti escenariu comunicativu. Xune Elipe volvió criticar amás la falta de política musical del gobiernu asturianu, dando como exemplu que nel 2005 nun hubo nengún actu oficial pa recordar la figura d'Eduardo Martínez Torner nel cincuentenariu de la so muerte. Per otru llau tamién denunció'l fechu de qu'en dalgunos casos nos que se lleva alantre dalguna iniciativa dende'l Principáu, esta nun se fai nes bones condiciones nin cola voluntá de facer les coses curioses, poniendo como exemplu d'ello'l circuitu de conciertos Axenda Cultural, qu'al so paecer tuvo mal organizáu y publicitáu, y que llevó por exemplu al grupu de Xune -Dixebra- a tener que suspender un conciertu en Nava porque l'equipu de soníu nun valía pal grupu, con más de 500 persones nuna carpa esperando pola música de Dixebra.

Otra manera, Xune Elipe tamién adelantó dalgunos de los proyectos nos que ta trabayando nestos momentos la so casa de discos. Elipe comentó qu'en pocos díes van tar na cai'l discu de bandurria asturiana de Daniel García de la Cuesta "Cantares de Bandurria", del que yá falamos n'Asturies.com, y el segundu discu de La Col.lá Propinde "Güeria", que va presentase el próximu día 29 nel teatru Vital Aza de la Pola L.lena.