Presentáronse les espublizaciones de los Premios Lliterarios 2011 baxo la demanda de más "apoyu políticu"

|

El martes presentáronse les espublizaciones de les obres ganadores de los Premios Lliterarios 2011. Nel alderique posterior demandóse a les autoridaes más “apoyu políticu” a “los premios más importantes de la lliteratura asturiana”.

El debate, moderáu pola escritora Vanessa Gutiérrez, principió tocando’l tema de la marxinalidá na que s’atopa la llingua asturiana tomando como entamu l’escritu qu’unvió Paquita Suárez Coalla, premiada residente en New York que nun pudo desplazase a Uviéu, y qu’entituló ‘Doi la cara pol asturianu, les muyeres y los homosexuales’. Nella falaba de les minoríes y del papel de la muyer nos cuentos infantiles, lo que llevó l’alderique –al que se sumó’l públicu– a tratar sobre’l futuru de la llingua y les posibilidaes de sobrevivencia del idioma siendo “minoría dientro d’una minoría”. Como nun podía ser d’otra manera, saltó a debate’l papel que xueguen les alministraciones nesti asuntu y xorrecieron les crítiques.

El primeru n’amosar la so disconformidá foi Inaciu Galán, presente ente’l públicu, que llamentó la falta d’apoyu políticu a estos premios, “los más importantes de la lliteratura asturiana”, poniendo como exemplos l’ausencia del presidente del país nel actu, asina como de representantes de la oposición, y el retrasu de la conseyera d’Educación, Cultura y Deporte, Ana González, que llegó col eventu bien avanzáu. Pela so parte, Xosé Anxelu Gutiérrez Morán, ganador del Premiu Xuan María Acebal de Poesía, tamién demandó un “apoyu real” y dixo nun entender cómo un eventu de tanta importancia nun contaba con televisión en direutu. Nesti puntu, Vanessa Gutiérrez viose obligada a cortar l’alderique por indicaciones de los responsables de la Biblioteca d’Asturies Ramón Pérez d’Ayala al pasar l’actu del tiempu establecíu, pero tolos presentes coincidíen na necesidá de dar un mayor puxu a unos premios que pasen desapercibíos pa la mayor parte de la sociedá asturiana.

Cinco obres premiaes

L’actu de presentación de les espublizaciones de les cinco obres premiaes asoleyaes por Trabe y Suburbia Ediciones principió con una esplicación de les mesmes y de la trayeutoria de los gallardonaos por parte de Vanessa Gutiérrez, que tamién s’encargó de lleer l’escritu unviáu por Suárez Coalla, ganadora del Premiu María Josefa Canellada de Lliteratura Infantil y Xuvenil por ‘Camín de lletres: d’Asturies a Nueva York’. Darréu, tomaron la pallabra, ún per ún, tolos ganadores, siendo’l primeru Xandru Fernández, gallardonáu col Premiu Xosefa Xovellanos de Novela por ‘El príncipe derviche’, un llibru que comenzó a escribir cola idea de que fora “mui cenciellu” y que foi creciendo y mudando col pasu del tiempu. “Trátase d’una historia sobre’l dolor físicu que sufrimos toos en dalgún momentu”, esplicó’l de Turón.

Lluis Portal Hevia, ganador del Premiu Máximo Fuertes Acevedo d’Ensayu por ‘Cipriano Folgueras. Una gloria d’Asturies’, centró la so intervención na figura d’esti escultor que desendolcó’l so trabayu nes décades últimes del sieglu XIX y na primera del XX. L’autor maliayo criticó que namái’l Muséu de Belles Artes d’Asturies recordara al uviedín coincidiendo col centenariu de la so muerte, que se cumplió nel 2011, y destacó la so trayautoria en París, Roma o Madrid, anque la mayor parte de les sos obres, con permisu de la Guerra Civil, caltiénense n’Asturies, ente elles la estatua de Fernando Valdés Salas nel edificiu históricu de la Universidá d’Uviéu. Por último, Portal afirmó que Folgueras yera un home “mui rellacionao cola cultura asturiana”, como amuesa la so bona rellación con Teodoro Cuesta o Pachín de Melás.

El ganador de la estaya de poesía de los Premios Lliterarios 2011, Gutiérrez Morán con ‘Un cierto desorde’, señaló qu’esta obra “ye un poemariu un poco reincidente”, en referencia a que toca temes habituales nos trabayos del avilesín como’l pasu del tiempu, la memoria o l’amor, y espuso la so intención de dar “un tonu diferente” a la obra. Tamién esplicó la so intención primera d’estucturar la obra en tres partes, con poemes previos a una estancia d’un añu nos Estaos Xuníos, los fechos nel continente americanu, y los posteriores. Sicasí, al final “los poemes foron onde ellos quixeron”, apuntó de manera prestosa.

Pela so parte, Isaac del Rivero, gallardonáu col Premiu Alfonso Iglesias de Cómic por ‘Doña Berta’, comentó a los presentes como a la hora de crear xunta les sos dos aficiones mayores, “el ‘tebeo’ y el cine”. “Cuando empiezo, pienso muncho en cada páxina, porque si nun toi contentu con ella o con una viñeta, van a la papelera”, aseguró. Tamién repasó los sos primeros años como dibuxante, cuando llevó una carpeta con unos trabayos “al periódicu”, na década “de los 50 o los 40”, y conoció a la persona que da nome a la estaya de los premios del que resultó vencedor. “¿Qué traes ehí, chavalín?, entrugóme Alfonso, y dende esi momentu fixímonos amigos”, recordó con cariño, pa depués llamentar que’l bustu nel Campu San Francisco al creador de ‘Pinón’ llegara cuando Iglesias tuviera tán enfermu y nun lo pudiera disfrutar. Por último, Del Rivero aseguró que, pese a los sos problemes de visión, espera “poder continuar” creando.

Na semeya, Fernández, Portal, Vanessa Gutiérrez, Gutiérrez Morán y Del Rivero.

Contador Estadistiques