Premiu Príncipe d'Asturies de Ciencies Sociales pa la ex-presidenta d'Irlanda Mary Robinson

El Xuráu del Premiu Príncipe d'Asturies de Ciencies Sociales decidió esta mañana concedé-y el distingu d'esti añu 2006 a la ex presidenta d'Irlanda Mary Robinson, siendo la primer vegada en 26 años de premios que se-y da esti premiu a una muyer.

L'acta del xuráu, que lleó'l senador Manuel Fraga Iribarne sorraya la "freba moral" de premiada y el so "compromisu permanente en defensa de los derechos humanos". Mary Robinson (1944) antigua alta comisionada de la ONU pa los Derechos Humanos, activista pola paz y polos derechos civiles y presidenta d'honor d'Oxfam Internacional, foi presidenta d'Irlanda ente 1990 y 1997 siendo la primer muyer en llegar al cargu. Baxo la so presidencia celebráronse en Dublin nel 1991 les primeres negociaciones dende 1974 pa llograr la paz nel Ulster, anque la iniciativa fracasó. A lo llargo de tola so vida, y tamién durante la so presidencia, Robinson rescampló como defensora de los derechos de la muyer, del derechu a la planificación familiar y de los derechos civiles de los homosexuales, ello nún país de fonda tradición católica nel que la sociedá refuga bien d'estes cuestiones.

Mary Robinson tien yá bien de premios nel so estoyu, ente ellos el Premiu CARE Humanitarian polos sos esfuerzos contra la fame en Somalia, el William Fulbright al Entendimientu Internacional, l'Erasmus de la Comisión Europea, el Félix Houphouët-Boigny de la UNESCO pola Paz, el Laski de l'Asociación d'Estudios Políticos del Reinu Uníu a la Contribución Destacada en Política Internacional y Sociedá Civil o l'Indira Gandhi pola Paz, el Desarme y el Desarrollu.